کولت.آذ گونئیلی شایر دومان بختیارینین شعیرینی تقدیم ادیر:

بیزی اوراقلاییب ایکی بؤلدولر
آرادا گوناهی آراز آپاردی
ائله شاققا چالیب ائله گولدولر
او دردی نه پاییز نه یاز آپاردی

قارا قول چکیلدی سول یانیمیزدان
ساغیمیز قانادی واراغین اوسته
دولدو سئوگیمیزه لاختا لاختا قان
قانیمیز یاخیلدی اوراغین اوسته

قالدی قیشا دؤندو حسرته دؤندو
باغلی قاپیمیزی آچان اولمادی
آغری آها دؤندو نیفرته دؤندو
بیزیم گؤیوموزده اوچان اولمادی

او قانلی واراغین قارا قولوندان
هره میز بیر یانا آخیریق ایندی
آرادا یول گئدن آجی نیسکیله
اوتوروب حسرتله باخیریق ایندی

نه آجی دورومدو بو چای قیراغی
سؤنور آلاووموز سؤنور کؤزوموز
کیمسه خاطیرلامیر او لال واراغی
نه قدر یاد اولوب بیزه اؤزوموز

بوردا آغری چکیر گوناها باتیر
دومانلی بیر کیشی داغلی بیر کیشی
اؤزونو آرازین قوینونا آتیر
ساغینا سولونا باغلی بیر کیشی