کولت. آذ رامیز رؤوشه‌نین "قوجالیق" آدلی شعیرینی تقدیم ائدیر:

تنهالیق باشلاییر بوردان او یانا،
کئچدیکجه کئچیلمز، آتام بالاسی.
آیلاری، ایللری توتسان بویونا،
چایلاری، چؤللری توتسان بویونا،
اؤلچدوکجه اؤلچولمز، آتام بالاسی.

داها چوخلارییلا آرام سرینلر،
چوخلاری بوینوما سئوینمز داها.
۲۳ یاشیم‌دا منی سئوه‌نلر
۳۳ یاشیم‌دا سئوممز داها.

من آخی نه چؤله‌م، نه یول، نه کوچه،
من آخی، هامینین اولا بیلمره‌م.
منی سئوه‌نلردن اؤترو اؤلونجه،
۲۳ یاشیم‌دا قالا بیلمره‌م.

نه قدر سؤزلر وار سؤزوم‌دن جاوان،
داها چیغیرماغا نفسیم گلمیر.
داها بو دونیادا اؤزوم‌دن جاوان
شعیرلر یازماغا هوسیم گلمیر.

کیریگیر، یومشالیر شعیرلریم ده،
قوجالیر میصراعلار، سؤزلر منیمله.
دوستلار جاوان قالیر شعیرلریم‌دن،
قوجالماق ایستمیر دوستلار منیمله.

ایلاهی، قوجالیق بویموش دئمه‌لی،
دوستلاردان سس‌سیزجه قیریلیر آدام.
عؤمور بیر بولانیق سویموش دئمه‌لی،
عؤمور آزالدیقجا دورولور آدام.

ایچیمین، چؤلومون یویولور پاسی،
ستیرلر گؤیریر بو آغ واراق‌دا.
نه چوخموش اورکله ائلین آراسی،
نه یاخشی اؤلمدیم بو آرالیق‌دا.

سؤزلر اورییم‌دن الیمه یئت‌دی،
بیر آزجا سولوخ‌دو، سول‌دو، نه اولار.
بیر آزجا شاخ‌لیغی، شوخ‌لوغو ایتدی،
هئچ کس قیناماسین، یول‌دو، نه اولار.

داها بالتا کسمز آغلیم کسه‌نی،
دونیانین دادینی بیلیرم داها.
بو قوجا دونیادا هر نفه‌سی‌می،
آغاج‌دان مئیوه تک دریرم داها.

سون نفس دونیادا هر شئیدئن شیرین،
شاعر ده قوجالیر، اؤلور، بیلیرم.
سؤزون‌دن قان ایگی گلن شاعرین،
آغزین‌دان سود ایگی گلیر، بیلیرم.

بو دونیا بیر قاینار قازانمیش دئمه،
سؤندورمز اودونو نه قار، نه یاغیش.
دونیایلا دالاشماق آسانمیش دئمه،
چتینی دونیایلا باریشماغییمیش.