شهر مهندیس‌لری دئییرلر: «شهرلرده‌کی پیادا ساحه‌لرین أن اهمیت‌لی ایش‌وئریمی اونون آلقی‌سال (ادراکی) رولودور. پیادا یولدا گئدیرکن، شهرین بیچیمی ایله برابر روحونو دا آلقیلایا بیلرسن.»

هر آخشام چاغی شانزه‌لیزه‌میزده قدم ویریرکن اونون بیچیمینه باخیب، روحونو آلقیلاماغا چالیشارام. آمما پیادا یولوندا آیاقچی‌لارین(دستفروش‌لارین) سریلمیش أشیالار ایله جماعتین قالابالیغی فیکریمی چاشدیرار، آنجاق قاریشقا کیمی قیمیلدایان جماعتین ایچیندن بیر تونل آچیب، کئچرم. اینانین گورجولر آغزینین قالابالیغی بیزیم شانزه‌لیزه‌میزین یانیندا هئچ گؤزه گلمز.

نه مارسل پروست بیزیم شانزه‌لیزه‌ده قدم ویریب نه جیمز جویس. داستایوفسکی یاشاسایدی بلکه خرج- قازانجینین حسابینی ایتیرن ألی بوش کارمند و ایشچی‌ کاراکترلرینی بیزیم شانزه‌لیزه‌ده تاپا بیلردی. داوود دوستار گورجولرده قدم ویریب، هوپبانا حئکایه‌سینی یاراتسا دا، اینانمیرام آیاغی بیزیم شانزه‌لیزه‌یه چاتسین.

بیزیم شانزه‌لیزه‌ده قدم ویران ائرکک‌لر و خانیملار ائش دئییل، أر- آرواددیرلار، اوشاقلاری ایله بیرلیکده قدم ویریب، یئره سریلمیش هر شئی‌ین قیمتینی سوروشوب، کئچرلر.

بارماق ساییسی میس شانزه‌لیزه‌سی وار بیزیم خیابانین؛ دون‌ژوان‌لاری ایسه باشلاری بؤرک‌سوز، أللری چلیک‌سیز‌دیر. توکانلارین قاباغیندا دایانیب، قادینلارین أن- بویونو گؤزدن کئچیریب، دقت‌لرینی چکن بیر أن- بوی گؤرونجه نجات غریق کیمی تلم تله‌سیک اؤزلرینی قالابالیغین ایچینه آتیب، او أن- بویا سورتوشه سورتوشه یول آچیب، ایچ‌لرینده دالغالانمیش او حیس‌لرینی یاتیردیب، اؤزلرینی نجات وئررلر.

توکانلارین قاباغینا دوزولموش بساط‌لاردان علاوه آرخ قیراغیندا بساط‌لارینی دوزموش آیاقچی‌لار سایه‌سینده بو خیاباندا ایینه‌دن تَه‌بَه‌نَه‌یه جن تاپا بیلرسیز. یورقان اوز- آستاریندان توتدو تا هئریز خالچاسی، سود- قاتیقدان توتدو تا ساختا نیقالای سماواری، باش سانجاغیندان توتدو تا کاکتوس چیچه‌یی، ساچ رنگیندن توتدو تا قیزیل گول عطری، أریک قاخیندان توتدو تا مرجیمک و...

آخشام چاغ‌لاری ماشین‌لار دا ایشلوینی ده‌ییشیب، آدام کیمی یئرییرلر. بیر ایکی ایل بوندان اول بلدیه مامورلارینین آددیملارینین سسی گلینجه آیاقچی‌لار یئره سردیکلری بساط‌لارینین دؤرد بوجاغیندان باغلادیقلاری ایپی دویونله‌ییب، چیین‌لرینه آتیب، تو دابانا قاچیب، جین کیمی گؤزدن ایتردیلر. بلدیه مامورو ایسه بیزیم شانزه‌لیزه‌یه یئتیشنده گؤرردی لـله وار یوردو یوخ. آمما بیر ایلدن آرتیقدیر نه قاچاقاچ دوشور نه ده آیاقچی‌لار بساط‌لارینین دؤرد بوجاغینا ایپ باغلاییرلار.

ساماندهی پیاده‌روها و زیباسازی شهر تبریز دئییلن مسئله بیزیم شانزه‌لیزه‌ده معناسینی ده‌ییشیب، اقتصادی دورمدان آسیلی اولاراق بلدیه مأمورلاری دا آخشام چاغ‌لاری آرواد- اوشاق ألیندن یاپیشیب، آیاقچی‌لارین بساطیندان آلیش- وئریش ائتمه‌یه گلیرلر. منجه منطقه بئش شهردار‌ی، تبریز شهرینین شورا عضولری و راهنمایی رئیسی ده آرواد- اوشاقلاری ایله أل أله وئریب، باغ‌مئشه‌یه گلسه‌لر، بیر اوخ ایله نئچه نیشان ویرا بیلرلر. خیاباندا آدام کیمی یئریین ماشین‌لارین حرکتینی یاخیندان گؤروب، بیزیم شانزه‌لیزه‌دن آلیش وئریش ائتمه‌یی خوشلاماسالار دا، بوتیک‌لرده چین و تورکیه آدی ایله ساتیشا قویولان رونق تولید مسئله‌سینه شاهید اولوب، هئچ اولماسا بیر ایینه آلیب، دمیر قیمتینی یوخلاییب، اورتاحال عایله‌لرین شانزه‌لیزه‌سی‌نین نئجه بیر خیابان اولدوغونو یاخیندان گؤرروب، خیابانین بیچیمینه باخیب، روحونو آلقیلاماقدان علاوه جماعتین اقتصادی دورمونو دا آلقیلایا بیلرلر.

آخشام چاغلاری بیزیم شانزه‌لیزه‌ تبریزین أن آزاد، أن جانلی، أن دیره‌نیشلی، أن قالابالیق مکانلاریندان بیریسینه چئوریلر. تبریز شهرینین خریطه‌سینده بیزیم شانزه‌لیزه‌نین آدی باغمئشه‌نین شهریار خیابانی‌دیر.