بیر گون ملا نصرالدین قونشوسوندان بیر قازان بورج ائله دی .نئچه گون سونرا قازانی بیر قازانچایلا بیرلیکده قونشویا گئری قایتاردی.

قونشو دئدی :آی بالا بو قازانچا نه دیر؟

موللا دئدی: سیزین قازان ،بیزیم ائوده دوغدو.

قونشو سئوینیب قازانلاری موللادان آلدی.

نئچه گون کئچدی .موللا گئنه قونشویا گئدیب ، قازان ایسته دی.

قونشو سئوینیب ،بئله دوشوندو ؛ بلکه موللا داها بؤیوک بیر قازان، گئری گتیردی ،اونا گؤره ان بؤیوک قازانی موللایا وئردی .
نئچه گون کئچدی ، آمما موللادان خبر چیخمادی .قونشو گئدیب ،موللانین قاپیسینی چالیب ، قازانی ایسته دی .
موللا دئدی : قازان دوغارکن اؤلدو!

قونشو چاشیب دئدی : آی ملا ،قازان دا اؤلر می ؟ نییه سفئح دانیشیرسان ؟

ملا دئدی : سنه ایکی قازان قایتاراندا دئدیم قازانین بیزیم ائوده دوغدو، نه دن اوندا بیر سؤز دئمه دین ؟ سئوینیب قازانلاری مندن آلدین .ایندی کی قازان دوغارکن اؤلوب منه سفئح دئییرسن . دوغان قازان بیر گونده اؤلرمیش .