ساهاتيما باخيرام ؛ اوچ ياريمي گوسترير باشيمين اوستونده آي ؛ نئچه ائلچي سي اولان ، اوتانجاق قيزلار كيمي ، قيرجاناراق قاش گؤز آتير. آدديملار قيسا آتيلير ، نفسلر يوكسلير . اردبيل شه هري آياغيميزين آلتيندادير.

اردبيل دن چكيلميش بير يول كي حيران گديگينه قدر چيراغلارلا ، نيشان لانيب ، اؤزونو گوسترير . سكوت قوشونو ساوالان داغيني باسقي آلتيندا ساخلاييب . يالنيز قولاغيمدا بير پيچيلتي وار ، عصيرلر آرخاسيندان گلن ؛ داغلار اوغلونون نعره سي... بير آتين كيشنه مه سي.

گوزومون اونونده ده بير قارالتي ... بير هيكل ... بير آتلي ... يوخ يوخ بير يالنيز ، سووارسيز ، بير آت گؤرونور ، بير آغ آت... آمان آللاهيم نه لر گورورم ؟ نه لر ؟ دويدوغوما اينانا بيلميرم بو بير يوخودو ؟ بير رؤيادي ؟ گئري دن بير سس گلير: « اوشاقلار يورولمياسيز آز قالير مئحراب داشينا ... باجارديقجا آدديملاري قيسا گوتورون ، تئز تئز نفس آلين... » بو سس دن اؤزومه گليرم . نه آت وار نه آتلي ... آي بيزدن قاباق مئحراب داشينا يئتيشيب . بيلميرم نييه اوره ييم سئخيلير . ائله ساز گويلومه دوشوب كي ياواش ياواش اوخوماغا باشلاييرام:

« بيزيم يئرده مشك و عنبر قوخوسون ... نازلي ديلبر گزن يئردي بو يئرلر»... بير سس گلير ؛ شاعير گوج و انرژيني ساخلا « پالان توكدو» قلبي سينه ... نفه سيني يورما ... يولوموزا دوام ائديريك . داها آي دان بير خبر يوخدور. ياواش ياواش ، اولدوزلار ايشيغين قورخوسوندان دنه دنه قاچماغا باشلاييرلار . دان يئرينه زه ده دوشوب ، شفق قيزارماغا باشلايير. ايستر ايسته مز ، هاودا بير سازاق وار . يوكسلديكجه سازاق سوموكلري نوازش ائدير . نيچه مين ايلدن بري ياپيريخان قارلارين اوزه ريندن گئچه رك ، پالان توكدونو آشيريق . ايندي قارشيميزدا مئحراب داش جيلوه لنير . مئحراب آدلي بير سال قايانين ساوالاندا اولماغي ؛ اونون مقدس ليگين ، موهورله يير . آخي ساوالان وحي مئيداني دير . نئچه پيغمبرين مزاري بورادا وار . «ساو» وحي دئمكدير . بيزيم قديم تورك بابالاريميز پيغمبره (ص) ؛ «ساوجي » دئييب لر . يعني وحي گتيرن . « آلان » دا كي توركجه ميزده ميدان معني سينده گليب. دئماق اولار كي ساوالان ، وحي مئيداني دير . يورقون آرقين ، باش گوْله دوغرو يوللانيريق . آرتيق گون ده آنا سينين قوينوندان چيخيب بويلانماغا باشلايير . بونو آرخاميزي قيزديران بير حيس بيزه آنلادير . ايچيمده بير دويغو وار ، بير اينام وار ، گله جه يه دوغرو بير اومود وار . همه شه اوجاليقلاردان ؛ غرور توره نير ، گوج توره نير ، ايلهام توره نير . داها دوغروسو هر شئي آياغيميزين آلتيندادير . چوخ چكمير كي اوزوموزو گوْلون قيراغيندا حيسس ائديريك . آمان آللاه ! بو نه گوزلليكدي! ، بو نه اينجه ليك ؟ بو نه تابلو ؟ نه بديعي اثر ؟ بو گولده كي سودو ؟ يوخسا عصيرلر بويو اصلي ميثاللي آذربايجان گوزل لرينين خومار گوزلريندن آخان ياشدي بو؟ قوملاري ، داشلاري دنه دنه سايماق اولور . گوزومو بير آن ، قيرپا بيلميرم كي بو گوزلليگي الدن وئره رم . ديليم توتولوب ، گوزلريم بير نوقطايا زيلله نيب قولاغيمدا بير حزين سمفوني چالينير. ايله بيل كي عوزيير بگين كوراوغلو اوپراسيندان بير پارچالار سسلنير: « آدو قويدون ده ييرمانچي ... چاغير گلسين دن كوراوغلو ... بيردن بيره بو توتولموش ديليمدن يوخ ؛ بو آليشان سينه مدن ، شعر آخماغا باشلايير:

هي وورورام اوز ديلمه
دانيش شاعير نه سوسوبسان ؟
سن قارتالسان زيروه لرده
نييه كهليك تك بوسوبسان

آمما ديليم آچيلماق ايسته مير . يئنه ده شعر سئل كيمي هر بير زادي زورلاماق ايسته يير:

گوزلريمده شيمشك چاخير
توكور ياغيش دامجي دامجي
قيفيللانميش بو ديليمين
دانيشماغا يوخدو گؤجو

اوغوجومو بو سودان دولدورورام ، دوْيونجا ايچيرم . گوزومون ياشي قوروماميش ، ياسلي ساوالان شعر مجموعه سيني يارادان اوستاد «بارز » دوشور ياديما . ياسلي ساوالان بير شعردير كي بارز بو آدي كيتابينادا قويوبدور. بو شعر بئله باشلايير:

هر زامان كي باخيرام باشينا قار وار گؤرورم
اوغلو اولموش آنا تك گؤزلرين آغلار گورورم
هر طرفدن چكيليب سينه وه داغلار گورورم
آي آلان اوستونو غم چيسگيني ، هر ياني دومان
آي ياغان باشينا غملر اودو ، ياسلي ساوالان ...

چنلي بئلده «ده لي لر » قوْي يئنه قورسون بوساطي
قوچ كوراوغلو يئنه جولانه گتيرسين قيرآتي
هئچ زامان اصلين ايتيرمز او كي دوزگوندو ذاتي
آند اولا آديوا ، آي گوزلري آغلار – ياشي قان
آي ياغان باشينا غملر اودو ، ياسلي ساوالان ...

بير طرفدن منيم اوره ك دويونتولريم ديگر طرفدن اوستاد بارزين بو ده يرلي شعري گوْلون اطرافيندا اولانلاري دا ذوقا گتيرير . بيري حزين حزين اوخوماغا باشلايير ، بيري ، بير نئچه باياتي ساوالان حاققيندا سويله يير ، بيري...

آرتيخ بير ساهاتدان چوخدوركي ساوالان لا، بو اؤزو همه شه آغ اورپگينن بورونن ايلاهه ايله خوسونلاشماقداييق ... سس گلير داها يئنماق زاماني گليب يئتيب ، ساوالان لا وداع لاشين ... اوزومو تورپاغا قويوب ، اولو تانريمدان كي بيزدن ، ساغلامليق نعمتين اسيرگه مه ييب ، تشككور ائديرم . ممد آرازين بو شعري آيريليق زاماني ياديما دوشور:

بلكه بو يئرلره بيرده گلمه ديم
دومان سالامات قال ، داغ سالامات قال
آرخامجا سو سپير گويده بولوتلار
نيسان سالامات قال ، ياغ سالامات قال
همه شه اوجالاردا اولاسيز ، قوي همه شه يوكسكلر سيزين اولسون.