کولت. آز اؤلمز شاعر نصرت کسمنلینین شعرینی تقدیم ائدیر:

هر سطر اۆستونده تیتره‌ییب الیم
سطرلر قلبیمدن اود آلیبدیلار
من سنه بیر دفعه آلداندیم، گۆلوم
مکتوبلار عُمرلوک آلدانیبدیلار

منی خاطرلاما، اؤزگه اول، یاد اول
اویونجاق اولماسین مکتوبلار باری
عمرونده بیرجه یول عالیجناب اول
یاندیر خاطره‌می، او مکتوبلاری

اوردا اۆره‌ییمین هارایی، آهی
قلبیمین اوتانجاق سئوداسی یاتیر
اوردا ووقاریمین سینما گناهی
کؤورک بیر نغمه‌نین صداسی یاتیر

داغیلار شهرتین دومانی، چنی
اوُدار بیر آج بالیق اینجی تک سنی
یازدیغیم سطرلر آج توخوم کیمی
بیر گۆن گؤز یاشینی ایچه‌جک سنین

مکتوبلار ایچینده نه‌ییم، نه لریم
آلوولو سطرلر گیزلی غم کیمی
یاندیر مکتوبلاری... خاطره‌لریم
یانسین، کۆله دؤنسون قوی کرم کیمی

سنه اومود دولو دیکیلن گؤزلر
یئنه خاطره‌ده دوْنوب قالان دیر
الیم اسه-اسه یازدیغیم سؤزلر
او زمان دۆز ایدی، ایندی یالان دیر

حیاتین اؤزونده سینادیم سنی
دئمه باهار ایدیم، ایندی سه قیشام
یاخشی کی، سونرادان تانیدیم سنی
یاخشی کی، عمرلوک آلدانمامیشام...