آغجا

آراز ایچینده جوجه سی اولان سبدی قاباغینا قویوب،قارنی اوسته اوزانیب،ایکی اللرین اوزونه وئریب،ملیل- موشکول آغجا جوجه سینه باخیردی.

یادینا گلیردی نئچه واخت بوندان قاباق،باباسی جوجه لری آلدیقدا، او دوم- آق جوجه نی اوزونه سئچدی.آخی او چوخ گویچک ایدی.هم ده گووورچینه اوخشاییردی.آدینی دا "آغجا" قویدو.

او گوندن جوجه بالاجا آرازین دونیاسی اولموشدو.اونا الینده دَن یئدیردیردی.سو ایچیردیردی.بوی-بوخونون اوخشاییردی.تبلتینده جوک-جوک جوجه لریم ماهنی سینی اونا آچیردی.هردن آتا-آناسیلا باغلارینا یوخسا طبیعته دولانماغا گئدنده،آغجانی دا آپاریردی.

امما نئچه گونویدو آغجا ناخوشلامیشدی.ائله یئییب ایچمیردی.هم ده قیچلارینین سوموکلری بوشالیب،حئیوانجا جَرجَنَک اولموشدو.قیچلاری بوددان ائله آیریلمیشدی آیاقلاری اوستونده دورا بیلمیردی.بیر شیکیل یئر اوستونده سورونوب ذرره جه دن- سو دیمدیکله ییردی.
آراز آتاسیندان قول آلمیشدی آغجانی بایطارا(دامپزشک)آپارسینلار.

بایطار آغجانین ناخوشلوغون "قوشلار راشیتیسمی" تشخیص وئردی.دئدی:آغجانین سوموکلری بوشالیب.ساغالماسینا اومود یوخ امما بو درمانلاری سویونا توکون.هم ده بودوندان بیر ایینه ووردو.

آخشام آراز الینده اونا قاینانمیش یومورتا ساریسی یئدیردیردی.حئیوانجا هووله سک دیمدیکله ییردی.آراز بئله سانیردی آغجا داها ساغالاجاق.امما صاباح سبده باخدیقدا اونو اوزانمیش گوردو.ایندییه جن تویوغ-جوجه نین ائله یاتماسین گورمه میشدی.چیغیریب آناسینی سسله دی:"آنا....آنا....آغجام یوخلاییب ترپنمیر".

آناسی میطباخدا چای دمله ییردی.هووله سک آرازا ساری قاچدی.ایلاهی نه گوروردو؟! آرازین بالاجا آغجاسی قول-قیچینی اوزادیب اوءلموشدو.بیلمه دی آرازا نه دئسین.او هله اوءلوم مسئله سین آنلاماغا کیچیک ایدی.آلتی یاشدا اوشاق نه بیلیردی اوءلوم نه دیر؟
الینی آرازین یومشاجیق تئللرینه گزدیریب، اوزونه باشقا بیر جوجه سئچ دئدی.

-آراز آغلامسییب، من آغجامی ایستیرم دئدی.

سونرا شاشیرمیش و تعجوبلو گوزلریله ساکیت اوزانان جوجه یه باخدی.

لاپدان بالاجا بدنی تیتره ییب،آناسینا اوشویورم دئدی.آناسی آرازی باغرینا باسیب،یورغانچاسینا بورویوب، اوز-گوزونو اوپدو.بو اوشاغین ایلک تجروبه سی اوءلومدن ایدی.

آتاسی ایکی سومو الینده ائوه قاییتدی.صوبحانه دن سونرا بالاجا آغجانی حیطلرینین باغچاسیندا باسدیردیلار.اوستونه ده بیر تیکه بالاجا آغ مرمر داش قویدولار.آتاسی:"آغجا جنّته اوچوب"دئدی.

آراز آغجاسینا داریخدی. بیرآز آغلادی.نئچه گون سونرا باشقا بیر جوجه اوزونه سئچدی.امما آغجانین اونلا اویناماسی،سونرادا نیسگیللی اوءلومو هله ده یادیندان چیخماییب.