قوربانلیق

اورتا یاشلی قارا بوغلو چوبان؛ سورونو چؤلدن قایتاریردی. قویونلارین صاحیبی اونلاری طووله یه سالاندا ،اؤز اؤزونه دوشونوردو بو ایلده گئچن ایله تای بو قویونلار خیر برکتلی اولاجاق انشالاه.

قویونلار قارانلیق طووله ده قایناشیب مله‌شیردیلر. یاشلیلار آما ساکیتجه گئچن ایلده باشلارینا گلنلری خاطیرلاییردیلار....

سحر آچیلا _آچیلمایا طوله نین قاپیسی آچیلدی. بیزی حیطه بوراخدیلار. سحرین هاواسی چوخ خوشا گلیردی.من سئوینجک اویان بویانا آتیلیردیم.آنجاق سورونون ایچینده من آنلامایان ، بیر کدر و نیگرانلیق واریدی. حیطین بیر گوشه سینده گوزل گئنیشلی اورتا یاشلی بیر کیشی دوروب صاحبیمیزله دانیشیردی. باشین چئویریب دئدی : بویور حاجی هانکیسین بینیرسن من آییریم.

منده آنامین یانیندا هر نه دن خبرسیز دوروب او کیشیه همده یانیندا دوران آز یاشدا گوزل اوغلانا، باخیردیم. خوشا گلیم تمیز سیر- صفتی واریدی .اودا منی گؤردو .منی توتماق ایستیردی منده قورخوب قاچیردیم. اوجا سسله دئدی : بابااا اونو توت وئر منه دا نولار؟ اودا گلیب منی آلدی قوجاغینا چوخ محبتله وئردی اوغلونا. سونرا نئچه شکیل چکدیلر. من بو ایشلردن هئچ خوشلانمیردیم .ندنسه چوخ بیر پیس حیسلر یاشاییردیم. هر دن ناله یله مله‌ییردیم. شهرلی کیشی نین گوزو آناما ساتاشدی .صاحیبیمیزه دئدی: ائله بو اولسون یاخشیدی کؤکدو .والاه بیلدیرکی نین اصلن کاری یوخودو ؛ نه أتی وار نه قویروغو،تئیخا سوموگودو. هئش جم جومو اون پای اولمادی. چوخ آداما وئرنمدیک.او آندا خانیمیسی دا ماشیندان أنیب اونا قوشولدو. دئدی: هن سن آللاه بو ایلکی اتلی جانلی اولسون آدامین آبری گئدر؛ دئیرلر بولاردا آج حاجیدیرلار قییمیرلار دوز_ عملی بیر قوربان کسلر!. ایلده بیر دفعه دی دا نئچه اولور اولسون مهم دئییل.

صاحیب، آنامی گلیب توتوب آپاردی ؛الیله بئلین بودلارین گؤرسئیب دئدی :باخ بو لاپ سن دئیندی با ...

حاجی دئدی: هه بو اولسون آللاه قبول ائلسین . صاحیب دئدی:حاجی ایستیرسن ائله بوردا کسیم آپار.حاجی دئدی: بلی آتاز رحمتده کس، دریسین زادین سوی .آما دئیم ها؛ کله سین اؤزوم آپاراجاغام.چوخداندی دا کله پاچا یئمه میشم.

صاحبیمیز دئدی: نئجه ایسترسن ائله اولسون...

منیده بو اوغلان اصلا بوراخمیردی؛ گاهدان قوجاغینا آلیب گاه قویوردو یئره بویومو اوخشویوب بوینومو قوجاقلیب اوپوردی. منده الیندن قورتولوب قاچیردیم اودا دالیمجا بؤیوک حیطی قاچیب منی توتوردو...اوشاخلیق عالمینده دوست تاپمیشدیم سانکی دونیا دان خبرسیز..

بیر آن آنامی گؤردوم قول قیچین باغلیب یاتیردیبلار یئره ،بیر کاسادا سویو زورلا اونا ایچیردیرلر.أل قولوم تیتردی؛ مه‌لیه مه‌لیه قاچدیم اونون یانین.ا اوغلاندا منیم دالیمجا.آنام منی گؤرجک گؤز یاشلاری آخدی. کیشی بویوک ایتی پیچاغی آنامین بوینونا قویاناندا !!!بسم اللاه! آللاه قبول ائلسین دئدی.آنام بیر آز ال قولون دبردیب ساکین اولدو. آنامین بؤینوندان آخان قانلا منیم گؤز یاشلاریم قاریشیب گئتدی. چؤنوب آوغلانا باخدیم. قیشقیرا _قیشقیراقاچدی آناسی نین قوجاغینا. آناسی بالام قورخما دئیه دئیه اونو اوورتماغا چالیشیردی. أرینه دئییردی بیز نه اشتباه ائلدیک بو اوشاغین یانیندا قویون باشی کسدیک.

کیشی دئدی: خانیم بو اوشاق دا گرک بئله ایشلری گؤره اؤرگشه دا....

اونلار آنامیدا اوشاغیدا گؤتوروب گئتدیلر.من قالدیم بیرده آنامین بوغازیندان تؤکولن قانلار..

قویونلار هامیسی یاتمیشدی..یئنه طوله نین قاپیسی آچیلدی...بو ایلده منیم نوبه مدی دئیه سن...اللاه قبول ائلسین...