آنا صحیفه ادبیات |
کولت. آذ ائلشن ایسماییلین لیلا آدلی حکایهسینی تقدیم ائدیر
چار روسییاسی و قاجار تورک خانهدانلیغی آراسیندا آذربایجان تورپاقلاری اوغروندا باشلایان محاربهنین قیزغین دؤورو ایدی. آرتیق وطنیمیزین دئمک اولار کی، بوتون گونئی حیصهسی گاوور روسلاردان تمیزلهنسه ده قوزئی اوغروندا ساواشلار سنگیمیردی. قهرمان عباس میرزلنین رشادتلی، اؤزونو مدافعه قوهلری تورپاقلاریمیزین هر قاریشی اوغروندا جانلاری باهاسینا مباریزه آپاریر، اونلارلا، یوزلرله ایگیدیمیز روسلارین خاین توپلارینا، موشکئتلرینه قوربان گئدیردی. بئله بیر زاماندا عثمانلی ایمپئرییاسی دا آوروپا ایله سنگیمهیهن بحران یاشاییردی. بیر دؤولت گویا اونونلا دوست ایکن، دیگری اونو آرخادان وورماغا چالیشیردی. غربده ده، شرقده ده تورکلره قارشی بؤیوک اویون داوام ائدیردی...
ساده بیر صنعتکار عائلهسیندن اولان احمد ده قارداشلاری، آتاسی کیمی عباس میرزانین اوردوسوندا خیدمت ائدیردی. یاشی ایگیرمیدن آزجا آرتیق اولان بو گنج دلیقانلینینسا وطندن باشقا بیر دردی ده وار ایدی. هاراداسا، ایکی ایل بوندان قاباق عثمانلی سرحدینده بی عائلهسیندن اولان لیلا آدلی گنج، گؤزللیگیله بوتون ایالتی، حتی اؤلکهنین چوخ حیصهسینی حیران ائدن خانیم اونون آغلینی باشیندان آلمیشدی.
احمد ایله لیلا ایلک دفعه لیلانین عائلهسی قاجار خاندانلیغیندان بیر بیه قوناق گلرکهن، مشهور خودآفرین کؤرپوسو یاخینلیغیندا تانیش اولموشدولار. لیلا او زامان اونو گتیرهن فایتونون پنجرهسیندن باخیب محتشهم آذربایجان مملکتینین گؤزللییندن حضآلیردی. احمد ده تصادفهن اورادا دوستلارییلا کیچیک بیر ائو تیکینتیسینه باشلامیشدی. بو ائوی تیکمهیه کؤمک ائتمیینیسه اوندان خالاسی اوغلو منصور خواهیش ائتمیشدی...
ائله بیر تانرینین قوتسال ملکلری او آن لیلانین چینینه قونموشدولار. چونکی احمد ایلک دفعه اونو گؤرهنده اونا ائله گلدی کی، لیلا گونش کیمی برق وورور، ایشیق ساچیردی. ائله بیر نئچه ثانییهنین ایچینده بیر-بیرینی تصادفا، یئرلی خالقین دئییمی ایله ایسه «تالعین یازیسی اساسیندا» گؤرهن گنجلر آشیق اولدولار. هم ده دلیجهسینه...
لیلانی گؤرهن، اونا بوتون وارلیغییلا وورولان احمد قدیم بیر تورکونو غیری-ایختیاری شکیلده زومزومه ائتمهیه باشلادی:
کرپیج، کرپیج اوستونه قوردوم بینانی،
بینانی قورار ایکن گؤردوم کی، لیلانی،
لیلا باشیما آچدی هر جور بلانی...
آه، لیلا، لیلا، لیلا، ائتمه بو نازی،
گل باریشاق، بابان قییسین نیکاحی...
بئلهجه هر ایکی عاشیق اوزون مدت اونلاری توولایان ایلاهی عشق ایله یانیب-آلیشدیلار...
دوزدور، او زامانلار آرتیق عثمانلییلا نورمال مناسیبتلر برپا ائدیلمیشدی، آنجاق هر ایکی طرفدن خالقین معین کوتلهسی هلهده ۳ عصردیر داوام ائدن قارداش دوشمنلیینی سوردوروردو. ائلجه ده احمدین عائلهسی...
احمد آتاسینا وضعیتینی آچیقلایاندا آلدیغی جاواب چوخ سرت و اوزوجو اولموشدو:
- بیز سنیدن قیز آلماریق...
بلی، ائله بو جمله بس ایدی کی، احمدین دونیا-عالم باشینا داغیلسین. قالان بوتون خیردالیقلارین، خصوصاً ده لیلانین بی، احمدین رعیت اهلیندن اولماسینین بیر معناسی یوخ ایدی، بو طریقت مسئلهسینین یانیندا...
داوامی وار
تاریخ
2019.08.17 / 14:56
|
مولف
آینورا مممدووا
|