کولت. آذ حبیب ساهیرین مرحوم فیریدون ابراهیمینین خاطره‌سینه حصر ائتدیی شعیری تقدیم ائدیر:

ایلدؤنومون توتان یوخ‌دور
یوخدور سنی یادا سالان
قبرین اوسته گؤی اوت بیتدی،
ای ناموراد یازیق جاوان
آسیلدیغین گون‌دن بری
ماتملی‌دیر گؤی گلستان

دولاشارکه‌ن شمال یئلی،
یوردون قیزیل بایراغین‌دا
ائللر ایله اود یاندیردین
بابکیلر اوجاغین‌دا
لاکین افسوس سون ایشیق تک
سؤندون حیات چیراغین‌دا

نه ائللرین مکتبین‌ده
کیتابینی آچان اولدو
نه یازدیغین قیزیل یازی،
رواج تاپیب دستان اولدو
لاکین سانما بو اسیرده،
هر شئی بیتیب نیسیان اولدو

گونون یئددی رنگی اریر
قیزیل اؤزه‌ن سولارین‌دا
سنین ایزین، کؤلگه‌ن قالمیش
آستارا’نین باهارین‌دا
فاشیزم هله حکم سورور
قیزیل اودلار دیارین‌دا

مکتبلرده آنادیلین
اوخوت‌دوران اوستا یوخ‌دور
اوردو اوردو اویماقلاردا
اسیر چوخ‌دور، آزاد یوخ‌دور
گئچیب چیراق، سؤنوب اوجاق،
خارابا چوخ، آباد یوخ‌دور

گئتدیم بابا دیارینا،
گؤردوم بایقوش فیکره دالیب
قبرین اوسته آخشام چاغی،
پاییز گونو شفق سالیب
سن‌دن یولداش خاطره‌لر،
درین سیزی جان‌دا قالیب

ازراییله قیلینج چکیم،
یئنه بیر گون اؤل‌جه‌یه‌م
چیراق کیمی، یا بیر آخشام،
یا بیر سحر اؤل‌جه‌یه‌م
بیلیرم کی یئر آلتین‌دا
توز تورپاغا دؤنه‌جه‌یه‌م

بونلا بئله امینه‌م کی
نور ظلمتی بوغاجاق‌دیر
ان نهایت اوفوقلاردان
قیزیل گونش دوغاجاق‌دیر
داش نه قدر برک اولسا دا،
ایستی سویوق اوغاجاق‌دیر