آنا صحیفه ادبیات |
سیقارئت آلماغا چیخمیشدیم. محلهنین چیخیشینداکی کؤشکه یاخینلاشیب بیر قوتو سیقارئت ایستدیم. ائوه طرف یولا دوشمک ایستییردیم کی، آرخادان بیر سس منی چاغیردی: "جاوان اوغلان، بیر باخ بورا!".
باشدان-آیاغا قارا گئیینمیش قارایانیز بیر قادین یئرده اوتوروب قوجاغینداکی کؤرپهنی امیزدیریردی. امدیی سود کؤرپهنین آغزینین قیراغیندان آخیب آنانین قارا اتیینه دامیر، آغیمتیل لکهلر یارادیردی. کؤرپهنین یاناقلاریندا خیردا، قیرمیزی سپکیلر وار ایدی، اونون قیز و یا اوغلان اوشاغی اولدوغونون فرقینه وارا بیلمدیم. قادین منی چاغیریردی. "بلی... ائشیدیرم!" - دئدیم. تبسسومله "بیر مانات وئر فالینا باخیم" - دئدی. الیمی جیبیمه سالیب ایکی مانات چیخاردیم، "...فالیما باخماغا احتیاج یوخدور، گؤتور"- پولو فالچییا اوزاتدیم... سسینی یوکسلتدی: "اولماز... قادان آلیم، قوی حلال اولسون. الینی وئر، فالینا باخاجام." فالا، فالچییا اینانماسام دا، غیری-ایرادی الیمی اونا طرف اوزادیب، اووجومو آچدیم. لاکین قادین درحال الیمین آرخا طرفینی چئویریب، دقتله باخماغا باشلادی. سانکی خریته اوزرینده کؤهنه بیر شهر آختاریردی. بیردن باشینی قالدیریب، گؤزلرینی گؤزلریمه زیللهیهرک، بیرنفسه "آنان کئچهن ایل قارلی بیر سحرده دونیاسینی دییشدی، آتئیستسهن، بیر ایله یاخیندیر بو شهره گلمیسهن، تلفون نمرهنین سونو ۸۹ ایله بیتیر، حیات یولداشیندان اوچ ایل اول آیریلمیسان، چوخ گؤزل پئشهن وار..." سؤیلهدی. تعجبدن دونوب قالمیشدیم کی، سون جملهنی ائشیدیب گولومسدیم. صیفتیمه سیرایت ائتمیش ایفادنی سئزهن قادین داوام ائلدی: "هه... ایشسیزلیک گؤزل پئشهدیر، یاراشیقلی اوغلان". ماتیم-قوتوم قوروموشدو... قادینین سؤیلدیکلری دوغرو ایدی. منیم حاقیمدا بو قدر معلوماتی هارادان و نئجه توپلامیشدی؟.. ایشسیز اولدوغومو دا بیلمیشدی... حالبوکی، ظاهری گؤرکهمیمله هئچ ایشسیز آداملارا بنزهمیردیم... قادین کؤرپهنی دؤشوندن آییردی، ساغ الینی قالدیریب قارا اوزون بارماقلارینین اوچونون قاتینی آچدی، اوزومه دقتله باخدی.
-جمعی اوچ گونون قالیب.
-آنلامادیم، نئجه یعنی؟
-یعنی اوچ گون زامانین وار، اوچ گوندن سونرا حیاتدان کؤچهجکسهن!
-اؤلجهیهم یعنی؟
-هه، دوز اوچ گوندن سونرا.
اورییم گیزیلدهدی، بدنیمدن بیر اورپرتی کئچدی.
-سن نه دانیشیرسان، خانیم، جوان اوغلانام، نیه اؤلمهلییهم کی؟ بلکه بیر ده باخاسان الیمه؟ - سون جملهنین آغزیمدان چیخدیغینا قولاقلاریم اینانمادی..
باشینی یئللهدی.
-"پیشه وری" پارکینین اورتاسیندا اوجا بیر کوکنار آغاجینین آلتیندا سکامیا وار. شنبه گونو ساعت ۲۱:۰۰-دا اؤلوم سنی اوردا گؤزلهیهجک.
-گئتمهسهم نئجه اولاجاق؟
-فرقی یوخدور، او سنین گؤروشونه گلهجک. اما بیل کی، سنین قیسمتین، آلین یازین اوردادی.
گولمهیه باشلادیم. فالچی قادینین قاشلاری آلنیندا دویونلندی، الینی بیر ده قالدیردی، بارماقلاری ایله اوچ رقمینی خاطیرلاتدی. سیماسیندا آجی بیر تبسسوم یاراندی.
- یاخشی دااا... آرتیق گئده بیلرسهن"- قادینین سسی کال چیخدی..
آیاغا قالخدیم، اییلیب چانتامی گؤتوردوم، ائوه ساری یولا دوشدوم.
تاریخ
2019.08.26 / 13:46
|
مولف
Axar.az
|