کولت. آذ هوشنگ جعفری "یار آغلادی، من آغلادیم" آدلی شعیرینی تقدیم ائدیر:

یار آغلادی، من آغلادیم

یارین بویون قوجاقلادیم،

یار آغلادی، من آغلادیم.

ییغیش‌دی قونشولار بوتون،

جار آغلادی، من آغلادیم.

باشین‌دا قار قالان داغا،

دانیشدیم آیری‌لیق سؤزون.

بیر آه چکیب باشین‌داکی،

قار آغلادی، من آغلادیم.

تاریم‌دا نار آغاجلاری،

منی گؤروب دانیش‌دیلار.

بویومو زئیتون اوخشادی

نار آغلادی، من آغلادیم.

ائله کی، اسدی بیر خزان،

تالاندی گوللریم منیم.

خبر چاتینجا بولبوله.

خار آغلادی، من آغلادیم.

اورک سؤزون دئدیم تارا،

سیملر اولدو پارا-پارا

یاواش-یاواش سیزیل‌دادی

تار آغلادی، من آغلادیم

دئدیم کی، حق منیمکی‌دیر،

باشیمی چک‌دیلر دارا.

طناب کسنده بوینومو.

دار آغلادی، من آغلادیم.

جعفرییه‌م بویوم بالا،

غم سینه‌م‌ده قالا-قالا،

یار جانی‌می آلا-آلا،

یار آغلادی، من آغلادیم.