آنا صحیفه ادبیات |
تانری مین بیرینجی گئجه سؤزو یاراتدی،
مین ایکینجی گئجه جامالی یاراتدی،
مین اوچونجو گئجه جامالین یازدیغی شئیری اوخودو
و اوله قاییتدی - قادینی تزهدن یاراتدی - اولکو تامر
کولت. آز تورکییهلی شاعر جامال سورییانین "چای کناریندا قادینلار گؤردوم" آدلی شعرینی تقدیم ائدیر:
پورسوق چایینین کناریندا
قادینلار گؤردوم،
بیر دئییل، بئش دئییل، ان آزی، یوز کره...
اومیدسیز سئودالارا توتولوبلار،
اوزو سهرایا سئیرهله-سئیرهله یاشاییرلار،
گول کیمی، چیچک کیمی.
نلری وارسا، وئریرلر آداما،
"آه" دئمهدن، "اوف" دئمهدن،
تکی کؤنوللرینه یاتاسان...
قیزیلیرماق کناریندا
قادینلار گؤردوم؛
دیللرینده یانیق-یانیق تورکولر:
"قیزیلیرماق پارچا-پارچا اولایدین،
اولایدین اوی، اولایدین اوی، اولایدین اوی.
هر پارچانی بیر درهده بولایدیم،
بولایدیم اوی، بولایدیم اوی، بولایدیم اوی.
سن ده منیم کیمی یئتیم قالایدین،
قالایدین اوی، قالایدین اوی، قالایدین اوی.
نئجه قییدین آللی-گوللو گلینه،
نئجه قییدین آللی-گوللو گلینه؟"
قیزیلیرماق کناریندا
قادینلار گؤردوم؛
بیر تیکه چؤرک - قاپقارا،
بیر توتام خینا -
اون قوروشلوق، قیپقیرمیزی...
قیزیلیرماق کناریندا
قادینلار گؤردوم؛
قارانلیقدا
اوزانمیشدیلار یان-یانا -
اوستلری یاریؤرتولو،
یاریاچیق...
اوی آنام، اوی آنام،
گئجهنین بو واختی
کیم اورکوتموش اونلاری،
ایستی یئرلریندن
پئریک دوشموشلر؟..
دجله ساحللرینه قاتار چاتینجا،
اؤنجه گؤی اوزو گؤرونور،
سونرا
گول قوروسو قادینلار...
بیر گون
سیزین ده یولونوز دوشر چای کنارینا،
گؤررسینیز، گؤررسینیز، گؤررسینیز
بیچاقلا سوموک، سوسماقلا آغلاماق
آراسیندا قالان
او قادینلاری...
تاریخ
2019.10.18 / 12:30
|
مولف
آیتاج آراز
|