کولت. آذ آزربایجنین نهنگ شاعری نریمان حسن زاده نین "یئرین گؤیون سیرری" آدلی شعرینی تقدیم ائدیر:

بیز یازیریق، پوزوروق،

یازیلمایان یازی وار،

یئر آلتینین یئر اوسته

گیزلی الیفباسی وار.

یاخشینین یانیندا پیس،

پیسین ده آرخاسی وار.

گول بیتیب قانقالا باخ،

تیکان قارماقاریشیق.

گولون گول بدنینده

تور هؤروبدو سارماشیق.

گوله بیر لکه بسدی،

سارالاجاق، سولاجاق،

آلاغی وور، تمیزله،

آلاق یئنه قالخاجاق.

گولون آرخاسی-باغبان،

سو وئریر، آلاق وورور.

آلاغین آرخاسیندا

یئر دورور،تورپاق دورور.

بلکه یئره یازیلیر،

گؤیون ریاضیاتی؟

تانریم، بلکه بو یوللا

اؤیردیرسن حیاتی.

یئر اوسته-بیز یوخولو،

آیاق آلتدا-یئر اویاق،-

گؤز ایله درک ائلسک،

عقل ایله اوخوساق.