کولت. آز سحر خیاوینین اوشاق ادبیاتی سیل‌سیله‌سین‌دن آرزولار صاندیقچاسی آدلی - یئنی یئتمه لر اوچون بیر حکایه‌سینی تقدیم ائدیر:

قار نارین-نارین کسمه دن اَلَنیردی.ایکینجی صینیفین اویرنجیلری ایستی کیلاسدا اوتورموشدولار.نفت سوباسی گور یانیردی.اوشاقلارین سویوقدان اوشوموش یاناقلاری، ایستی گوردوکده، آلما کیمی قیزارمیشدی.

اویرتمنلری"نیگار خانیم"اوزل چارپاییسیندا اوتورموشدو.او تکجه اوشاقلارا درس وئرمگی اوزونه گوءرَو بیلمیردی بلکه هر بیر جهت دن اونا اویرنجی کیمی تاپشیریلان اوشاقلاری آراییردی.اونلاری اوشاقلیقدان بیر"اینسان"کیمی یاشاماغا یوءنلدیردی.بئکار واختلاریندا اوشاقلارا کولتور و آنا دیللری باره ده دانیشیردی.صمد عمی نین ناغیللارینی آنا دیلینده اونلارا اوخویوردو.اوشاقلار اویرتمنلری نیگار خانیمی چوخ سئویردیلر و تانیمادیقلاری گورمه دیکلری،شیرین سوءزلو صمد عمی یه اوره ک باغلامیشدیلار.

اویرتمن همشه کی کیمی نومره دفترینی آچدی.اوشاقلاری حاضیر-غاییب ائله دی.بو ماجالدا او اون بئش(۱۵) اوشاقین جیسم و روح دوروملارینی یوخلادی.فیل ییخان او ظالیم سویوقدا اوشاقلارین چوخونون اوستو-باشی تونوکویدی.اَیین-باشلاریندا قالین پالتار و آیاقلاریندا قیش باشماقی یوخویدو.حتا بعضن نایلون یای دمپایاسی ایله او بوراندا مکتبه گلمیشدیلر.

نیگار خانیم چوخ کووره لدی.بونلارا بیر چاره گرکلی ایدی.او گون بوتون نه ائده جه یینه فیکیرلشدی.

صاباحیسی گون اوشاقلار اویرتمنین ماساسی نین اوستونده بیر صاندیقچا گوردولر.تعجوبلو او گوللو-چیچکلی صاندیقچایا باخیردیلار.
خانیم معللیم دئدی:اوشاقلار بو آرزولار صاندیقچاسی دیر.هر کسین هر نه اونملی اوره کدن کئچن آرزوسو وار یازیب بو صاندیقچایا آتاجاق.

اوشاقلار دفترلریندن واراق جیریب کیچیک اللری ایله آرزولارینی یازیب صاندیقچایا آتدیلار.اویرتمن آخیر زنگ درسیمیزین سونوندا صاندیقچانی آچاجاغام دئدی.سونرا درسی باشلادی.

آخیر زنگین سونوندا اوشاقلارین بالاجا اوره کلری سئرچه اوره یی کیمی چیرپینیردی.اونلارین کال آرزولاری صاندیقچانین ایچینده یدی.
اویرتمن صاندیقچانی آچدی.بیر-بیر آرزولاری اوخودو.بیر قالین قیش پالتوسو،چکمه،شال، بوءرک،الجک،ایپ جوراب،یاتیب-دوران قولچاق و...و.‌‌...و...

اوشاقلارین کیچیک آرزولاریندان کووره لدی.ناظیم حکمتین شعری یادینا دوشدو:

"بیر کیچیک سئوینج ایسته ییرم

ائله کیچیک اولسون؛

کیمسه اونو آلا بیلمه سین من دن".

بو گون ده بئله سووشدو.

صاباحیسی خانیم معللیم یئنه صاندیقچایلا کیلاسا گلدی.چارپاییسیندا اوتوردو.حاضیر-غاییب ائلییه ندن سونرا اوشاقلاردان ایسته دی هر اون بئشی اویرتمن ماساسی نین دوره سینه ییغیشسینلار.اوشاقلارا گوزلرینیزی یومون اوچ دئیه نده آچین دئدی.صاندیقچانی آچدی.بیر- ایکی- اوچ.آچین گوزلرینیزی گوزل بالالاریم.قیزلار گوزلرینی آچدیلار.واااا...ی گوردوکلرینه اینانمیردیلار.یازدیقلاری آرزولار زر پولک ایچینده صاندیقچادا اونلارا گوءز ووروردیلار.

اوشاقلار اوره کدن هوراااا چکیب گولوشدیلر.

خانیم معللیم:ایندی هر کس اوءز آرزوسونو صاندیقچادان گوتورسون دئدی.من بیلمیرم کی کیمین آرزوسو هانسی ایدی.اوشاقلار سئوینجک آرزولارینی گوتوردولر.خانیم معللیم دئدی: جئیران بالا اولدوغونوزا مَلَک لر آخشام بونلاری سیزه پای گتیریبلر.اون دوءرد سئوینجک اوشاقین اللرینده آرزولاری واریدی.یالنیز مرضیه دولغون گوءزلری ایله اونلاری سوزوردو.

خانیم معللیم دئدی:اوزولمه جانیم مرضیه،سنین ده آرزونو ملک لر گتیریب لر.یالنیز زنگ چالینارکن گرک سن ایله بیرگه ائوینیزه گئده ک اوردا آرزونو وئره جه یم.مرضیه نین سولغون دوداقلاری گولومسوندو.اوشاقلارا اَسرک سس ایله "موبارک دیر"دئدی.

مرضیه نین آناسی چوخدانیدی اوره ک آغریسیندان عذابدایدی.داوا کار وئرمه دیک ده دوختور آچیق قلب عملی اونا اوءنرمیشدی.امما بو آغیر عمل اوچون پوللاری یوخویدو.مرضیه نین آتاسی ساده بیر فهله یدی.قیزین ان بویوک آرزوسو آناسینین ساغلاملیغی ایدی.
زنگ چالینارکن خانیم معللیم اوشاقلاریلا بیرگه مرضیه گیلین ائولرینه گئتدیلر.آناسی یورغان- دوشَکده یاتمیشدی.ائولری کاسیب اولسادا ، تمیزلیکدن پاریلداییردی.

عیادتین آخیریندا خانیم معللیم کیفیندن بیر گوللو-چیچکلی پاکئت چیخاردیب آنانین دوشَکی آلتینا قویدو.دئدی:بو دا مرضیه نین آرزوسو.سونرا اوشاقلاردان ایسته دی بالاجا اللرینی گوءیه ساری قالدیریب مرضیه نین آناسی نین شفاسینی تانریدان ایسته سینلر.بیرده خانیم معللیمین اوره ک آرزوسونو اللاهدان دیله سینلر.

نیگار خانیمین حیات یولداشی دوختور اولماغینا رغمن ایللریدی اوشاقلاری اولموردو...