یوخاری

ایچین‌ده‌کی قز "- حکایه‌"- ایکینجی حیصه

آنا صحیفه ادبیات
12 Punto 14 Punto 16 Punto 18 Punto

کولت. آذ رقیه کبیرینین " ایچین‌ده‌کی قز "آدلی حکایه‌سینی تقدیم ائدیر:

اولی بورادا

ایچیمده‌کی کوسگون قیز دینمیر؛ دانیشمیر فیکیره دالمیش.جوجه جاوادین ایسلانمیش اوورکوتونا باخیر. دئییرم «چوخ شستلی، بویلو-بوخونلودو» ایچیمده‌کی، سس‌سیزجه اونون بوی-بوخونونا باخیر. منیم جانیم گیزیلده‌ییر.« قوجاغی اون قادینی بیردن قیزدیرار» دئییرم. ایچیمده‌کی منه ترس باخیر. اؤزوم ده بئله دوشوندویومدن اوتانیرام.

اوزاقدان هافیلتی سسی گلیر. ایت‌لر هوروشورلر. یئنه اؤزومو قیناییرام «عاقلین قاچمیشدی! تک باشینا، قیشین چیلله‌سینده، کولک‌ده، "تک آلتی"‌یا گله‌سن!؟» ایچیمده‌کی کوسگون قیز دئییر: «دئمه‌دین قورددان، جیک-جاناواردان گلیب آدامی تیکه-پارچا ائدر!؟»

دئینده "تک آلتی" داغینا گئده‌ک، خوشلاندیم. بیلسه‌یدم بو قدر سوسیالیزم‌دن، کاپیتالیزم‌دن، دانیشاجاق گلمزیدیم.

هئیبت‌لی آدامیم سایمازجاسینا، قوللارین توولایا- توولایا، دوشوب قاباغیمدا گئدیر. اونون ایستی قوجاغی‌نین فیکری منی اوشودور. ایچیمده‌کی ایله هیم‌له‌شیب، ال-بیر اولورام: «گل! بیر ایش گؤرک کی، هئچ اولماسا الیمدن یاپیشسین دااا...!»

قار دنه‌جیکلری داغین هر طرفین چولقالاییب. ساغیم- سولوم، اؤنوم -آرخام، هر طرفه باخیرام آغ آپباغ‌دیر. بیز، داغ جیغیریندا یئریین ایکی قار آدامی‌ییق. دنه‌جیکلر، قار آداملاری‌نین اوست-باشینا اله‌نیر. ایچیمده‌کی کوسگون قیزا دئییرم«باشلییاق؟!»

ایچیمده‌کی‌نین اوره‌یی ائله تاپپیلداییر کی، من ده ائشیدیرم. هیجاندان نه ائده‌جه‌یینی بیلمیر. تله‌سیر. اؤلور بئله ایشلردن اؤترو. آیاقلاریم بیر آن دایانیر. «بیر آددیم بئله آتمیاجاقسان!» دئییرم. اونو چاغیریرام؛ «یولداش جاواد! جوجه جاواد! یولداش...!» دؤنوب منه باخیر. ایچمده‌کی دئییر: «کاش قوللارینی آچسین، گلیب دئسین...»

قوللارین آچمیر، ساچلاریندا، بیغلاریندا اوتوران قاری چیرپیر. «دایاندیم، سنی گؤزله‌ییرم، گل!» دئییر.

ایچیمده‌کی شیلتاق قیز دوداقلارینی بوزور. «بو دا کی، اخلاق یوکودو » دئییر. اونا یاخین‌لاشاندا، یولا دوشوب، گئدیر. ایچیمده‌کی بیردن دوشونجه‌مین اورتاسینا آتیلیر«بس سنین آیاغین سوروشمز؟»

هئچ بیلمیرم نه اولور. بیردن ییخیلیرام. یئرده، اوزاناقلی وضعیت‌ده، اونا ساری سوروشورم. ایچیمده‌کی، «کاش اونا توخوناسان » دئییر. اوندان بیر آز قاباقدا بیر داشا توخونوب، دایانیرام. جانیم اینجییر. یئرده اوزاناقلی قالیرام. قایغیجیل، مهربان آیی کیمی، اییلیر، اوزومه باخیب دئییر: « نه اولدو؟ آیاغین سوروشدو؟» باشیمی ترپه‌دیرم «قالخا بیلرسن؟»

«هه» دئمک ایسته‌دیییمده، ایچیمده‌کی اورتایا آتیلیر. قوللاریمی توتوب، اونا ساری اوزالدیر. او ایسه، بیر الیی‌ ایله کوره‌ییمدن، او بیریسی ایله الیمدن توتوب، منی یئردن قالدیریر. ایستی نفسی اوزومه دییر. دونموش یاناقلاریم قیزیشیر. پالتارلاریمین قارینی چیرپیرام. ایچیمده‌کی، آز قالیر آغلاسین.

آخشامین آلاتورانیندا، یئتمیش یاشلی، هئیبت‌لی، اوجا بویلو، باشی پاپاقلی، یاراشیقلی،کورکو چیگینینده بیر کیشی، دامچانین قاباغیندا دوروب. الینده‌کی فنری یوخاری قالدیریب. بیزه باخیر. آغارمیش تئل‌لری پاپاق آلتیندان آلنینا توکولوب. ایچیمده‌کی دیله گلیر: «بو‌دا‌کی استالینین دوغماسی‌دی !»

گوله-گوله سالام وئریب، خوش گؤردوک! دئییر. آغزیندان چیخان نفسی، سانکی بم موسیقی‌نین، نوت‌لاری‌دیر، دونموش هاوادا یوخاری اوچور: «خانیم قیزیمیز خوش گلیب، خوش گؤردوک سنی، آی اوغول!»

ایچیمده‌کی قولاغیما پیچیلداییر: « نه گؤزل سسی وار!»

ایچری گیرنده دامچانین ایستیسی، اودون‌سوبا‌سی‌نین قوخوسو، ساکین‌لشدیریجی درمان کیمی، وجودومو دینجلدیر.

بهلول‌ عمی، بوز رنگلی لهستان چارپایی­سینی سوبانین دیبینه قویوب منه باخیر: «ایندی جانین قیزیشار» سونرا، ایکی استکان-نعلبکی گتیریب، سوبانین یانینداکی آغ بویالی، دمیر میزین اوسته قویور. بیر آن ایچیمده‌کی تعجّب‌له یئریندن قالخیر. بهلول عمی، چای‌نیکین لولویونو آغزینا دایاییب، اوفورور:«بونون دا لولویو توتولوب» دئییر. جوجه جاواد منه گؤز وورور«دونیادا سنین چای­لارین کیمی دادلی بیر چای تاپیلماز؛بهلول عمی!» گؤزوم استکانلارا سوزولن چایدا قالیب.

بهلول عمی، کورکونو چیگین لرینه چکیب، منه باخیر. «خانیم قیزین قایناناسی دئیه‌سن بیله‌سینی چوخ ایسته‌ییر. سیز گلمزدن بیر نئچه‌ ساعات قاباق پیتی قویموشام. دوروم، بیرآزجا سویون آرتیریم.»

قاپی‌نین یانینداکی آفتافانی گؤتوروب، پیله­ته­نین اوستونده‌کی گوودوشون دوواغین گوتورور، اتین اییسی بورنوما دولور. آجیمدان اؤلورم.

بهلول عمی، آفتافا‌دان، پیتی‌یه بیر آزجا سو تؤکوب، دوواغی قویور. ایچیمده‌کی قیزین آغزی آچیلا قالیب. جوجه جاواد، بارماغین دوداغینا قویوب،گوله –گوله سوس دئییر.

گؤزومو بهلول عمی‌دن آییرا بیلمیرم. آفتافا الینده قاپی‌یا ساری گئدیر: «سیز چای ایچینجن، من سو باشینا چیخیم، گلیم» دئییر. هئیبت‌لی هئیکلی قاپی‌نین آرخاسیندا ایتیر. سوبانین ایستی‌سی قاردان ایسلانان شالواریمی قیزدیریر. ایچیمده‌کی هیجانلی دجل قیز، باخیشلارینی جاواد یولداشین گؤزلرینه تیکیر. من اوتانیرام. یاناقلاریم قیزاریب، پؤرتوب، سیر-صیفتیم توتوب.

سوبا داکی اودونلارین چیرتا-چیرت سسینی دینله‌ییرم.

بیر آن جوجه آیی‌نین گوجلو قوللاری لهستانی چارپایی­نین آرخاسیندان بوینوما دولاشیر. جانیم گیزیلده‌ییر....

تاریخ
2019.11.21 / 21:03
مولف
Axar.az
شرح لر
دیگر خبرلر

آزادلیق، آتامین منه وئردیی دوز چؤرکدی... - قاسمی

پوشکینین دوئله چاغیردیغی مشهورلار: عمی‌سی، دوستو، همکاری، ناظر...

آدامی بیر باخیش دا چؤکدوره بیلر- شعیر

چئریلر بیری ایکی گؤرور؟ - تبریز لطیفه‌سی

سن گئتدین، ائله بیل دونیا بوشالدی-شعیر

«قرنفیل شهید قانی، آغلا قرنفیل آغلا «– مممد آسلان

نه گؤزل سوزولور قارا گؤزلرین... - شعر

چوخ ایسته‌میشدی قاشلارینی اوینادیب اونو اله سالا، سونرا دا -حکایه

روحوم او تایدادیر، قبریم بو تایدا- شعیر

اوشاق ادبیاتی: الیفبا کیتابینی آچدی بالاجا اسد - شعر

خبر خطّی
Axar.az'da reklam Bağla
Reklam
Bize yazin Bağla