کولت. آذ رامیز رؤوشه‌نین "سون گؤروش" آدلی شعیرینی تقدیم ائدیر:

بو واخت‌سیز سئوگینین عجلی یئتدی

بوی‌دو قیسمتیمیز یا تئز یا دا گئج.

هره اؤز دردینی آپاردی گئتدی

بس نیه دردیمیز آزالمادی هئچ... ؟

دونیا داغیلمادی بیز آیریلان‌دا،

گؤیلر بیراز یاغیش چیله‌دی آنجاق...

من سنه خوشبختلیک دیلدیم اوندا،

سن منه راحتلیق دیلدین آنجاق...

راحت‌لیق دیلدین ائو ائشییمه،

کؤرپه‌مین بئشیینه،

نوه‌سی دیزی اوسته چیخان

آتاما - آناما دا.

بیر واخت سن‌دن اؤنجه راستیما چیخان،

سنی من‌دن آلان قادینیما دا...

ایستدیم سون دفعه باسیم باغریما

دئدین - "نیه لازیم، یوخ یاخشی دئییل..."

آغلادین دئدیم کی، "کیری آغلاما"

دئدین کی، "یاغیش‌دی گؤز یاشیم دئییل..."

بو گؤروش سونونجو گؤروش‌دو داها

"بو گون آیریلیریق" دئییب گلمیشدین

بس نیه منیمله سون آیریلیغا

ان گؤزل دونونو گئییب گلمیشدین..؟

بس نیه او جوره گؤزلدین اوندا؟

ایندی بونو نئجه یوزوم بیلمیرم.

بلکه ده سون دفعه منیم یادیم‌دا

گؤزل قالماق ایدی آرزون، بیلمیرم...

بیر سئوگی یاریمچیق قیریلدی او گون

یاغیش دا کسیلدی بولود دا گئتدی

بیر قیزلا بیر کیشی آیریلدی او گون

هره‌سی بیر یانا اوز توتوب گئتدی .

او قیزدان گؤزل قیز تاپیلماز داها

داها او کیشی‌دن ایگیدی یوخدور.

اما بو دونیادا خوشبخت اولماغا

داها هئچ بیرینین اومیدی یوخدور...