آنا صحیفه ادبیات |
کولت. آذ گونئیلی شاعره ملیحه عزیزپورون ایکی شعیرینی تقدیم ائدیر:
باخیشینی مندن آلما، یاز نفسلیم!
قوی
باریشان اولدوزوموزو
گؤزلرینده پارلاق گؤروم.
آی تانینماز اسکی تانیش!
اینان سوسماقدان یورولموشام
گل منی
بوستان قورخولارینین قارانلیق شهریندن آل
ناغیلداکی ببکلرین یوردونا گؤتور.
گلیشینه تلس
آددیملارین اوچون
بیر قوجاق قیزیل گول نذریم وار.
۱۱
دلی-دلی گولوب دئمه اوشاقسان!
بیر باخسانا
باشاریرام سایماغی
بیر...
ایکی...
سونرادان اوچ...
ایگیرمی ایکی یاشیم وار
باشاریرام سئومیی.
باشاریرام سنی شعیره قاتیب ایچم
گؤزلریندن اینیمه بیر دونلوق بیچهم
دوشلرینه جیغیر سالیب اورادان کئچهم.
باشاریرام سنی سندن آلیب قاچام
اورییندن اورییمه بیر یول آچام
آی اولدوزلو تونلرینه سئوینج ساچام.
باشاریرام باخیشیندان بالیق توتام
باشاریرام گولوشوندن آلما درهم
باشاریرام...
آنجاق بیر آن سنسیز یاشاماغی
باشارمیرام...
باشارمیرام...
باشارمیرام.
تاریخ
2019.11.22 / 20:44
|
مولف
Axar.az
|