کولت. آذ رامیز رؤوشه‌نین "بو گوزگویه بیر واخت..." آدلی شعیرینی تقدیم ائدیر:

بو گوزگویه بیر واخت قوشا باخاردیق،-
بو گوزگوده یئرین ایندی بوش قالیب.
بلکه سن‌دن بو گوزگونون جانین‌دا
دوداق قالیب، کیرپیک قالیب، قاش قالیب؟

گؤز یاشلارین جانین‌دادی، بلکه ده
داملا-داملا ارییه‌جک بو گوزگو.
بیر گون سنین آیاغینلا دونیادا
آیاق آچیب یئرییه‌جک بو گوزگو.

بلکه، سنی آختاراجاق، گزه‌جک
میلیون-میلیون آداملارین ایچین‌ده.
گؤره‌ن کیمی تانییاجاق اوزونو
ان قاران‌لیق آخشاملارین ایچین‌ده.

قاچاجاق‌سان بو گوزگونون الین‌دن،
دؤنه‌جکسه‌ن او دؤنگه‌یه، بو تینه.
آداملاری، ماشینلاری، ائولری
آتاجاقسان بو گوزگونون جنگینه.

یئنه، یئنه دویمایاجاق بو گوزگو،
بیر شهری اودوب، اودوب گله‌جک.
سنی گؤزدن قویمایاجاق بو گوزگو،
یئری-گؤیو توتوب، توتوب گله‌جک.

سن قاچدیقجا یئل‌لنه‌جک ساچلارین،
بو گوزگویه پای دوشه‌جک ساچیندان.
ایپک دونون یئللندیکجه گوزگویه،
پای دوشه‌جک اتیینین اوجون‌دان.

قاچیب-قاچیب اؤزونو یوراجاقسان،
قفیل بیردن گؤره‌جکسه‌ن او داشی.
بو گوزگونو داش آتیب قیراجاقسان،
بو گوزگودن داغیلاجاق گؤز یاشین.

هر تیکه‌سی قاییق تکی اوز‌جک،-
دؤرد طرفی گؤز یاشینلا دولونجا.
بو گوزگونون بلکه هر تیکه‌سین‌دن
دوداقلارین چیغیراجاق دالینجا.

...بو دا بئله بیر ناغیل‌دی یالان‌دان،
سن کی، یوخ‌سان، گئتدیین او گئدندی.
بو گوزگو ده یئرینده‌دی، یئرینده،
بو گوزگو ده یئنه ساغدی، بوتؤودو.

سینان گوزگو آخی بیر ده جالانماز،-
بلکه تانری اؤزو گؤروب بو ایشی؟!
بو گوزگونون هر تیکه‌سی بلکه ده،
داملا-داملا گؤز یاشینلا بیتیشیب.

بلکه سن‌دن بو گوزگونون جانین‌دا
دوداق قالیب، کیرپیک قالیب، قاش قالیب.
گؤز یاشلارین جانیندادی هله ده،
گؤز یاشلارین قوروماییب، یاش قالیب.

بو گوزگودن گلیب کئچیر خانیملار،
اؤزلرینه باخیب-باخیب کئچیرلر.
دوداغیندان دوداقلاری رنگ آلیر،
کیرپییندن کیرپیک تاخیب کئچیرلر.

گؤز یاشینلا دولور، دولور گؤزلری،
باخیر یئره، باخیر گؤیه آغلاییر.
بو نه درددی-هئچ بیلمیرلر اؤزلری،
هئچ بیریسی بیلمیر نیه آغلاییر...