کولت. آز بولوت قاراچورلو نون شئیرینی تقدیم ائدیر:

قارقیش زمانه‌نین قانونلارینا
قارقیش اورک‌لری آییرانلارا
قارقیش اینسان‌لاری قفسه سالیب
بشر حقوقوندان دم ویرانلارا

کیمه دئمه‌لی‌ییک دردیمیزی بیز
درد بیلن کیمدیر سوز آنلایان کیمدیر
اسیر بیر میللته محکوم بیر ایله
قایغی چکن کیمدی آغلایان کیمدی

بو شرف بو شوکت بو قدرت بو شان
هورا دوغرودان دا بیزه عار اولسون
حیاتین آمانسیز بیر قانونو وار
تعصب‌سیز میللت گرک خوار اولسون

گرک گؤزلریندن سؤز اؤرته بیرکس
قارغا یوواسینا یاناشا اگر
نییه وطنیمی سئومه‌ییم نییه
من بیر قارغادان دا اسگییه‌م مگر

چاپماق ایسته‌میرم من هچ میللتین
نه دیلین نه یئرین نه ده امه‌یین
تحقیر ائتمه‌ییرم هده‌له‌میرم
کئچمیشین ایندیسین یا گله‌جه‌یین

آنجاق بیر سؤزوم وار منده اینسانام
دیلیم وار خلقیم وار یوردوم یووام وار
یئردن چیخمامیشام گؤبلک کیمی
آدامام حاققیم وار ائلیم اوبام وار