شعیریمیزین مشهور میصراعلارین‌دان عبارت ماراق‌لی اکسپریمئنتی تقدیم ائدیریک. شعیرده واقیف بایاتلی، موسی یعقوب، رامیز رؤوشن، سلام ساروان، ائلدار باخیش، روستم بئهرودی، علی کریم، نریمان حسن‌زاده و دیگر شاعرلرین مشهور میصراعلاریندان ایستیفاده اولونوب.

آخشام دا غریب‌دی، من ده غریبه‌م.
اویاتما مورگولو خاطره‌لری.
بلکه بو یئرلره بیر ده گلمدیم
باهار بوداقلاردان چکیله‌ن کیمی.

باغیشلا اوتاغیم تؤر-تؤکونتودور.
یووام دیمدییم‌ده گزیرم هله
منی سئوه‌نلرین هامی‌سی اؤلدو.
سن ائله بیر واختی راست گلدین منه.

من سنین یانین‌دا دورورام، سنین

هایان‌دا دوروم کی، گؤره‌سه‌ن منی؟
منیمکی عشق دئییل، دیوانه‌لیکدیر.
من اؤزوم ارکؤیون اؤیرتدیم سنی.

من بیر آز باهارلی بوداق کیمییه‌م
قارداشیم آغاجلار، باجیم چیچکلر
سن ده قار کیمی‌سه‌ن سویوق و گؤزل
سن ای ماوی گؤیلر، سماوی گؤیلر.

داها بو قله‌میم چیچک بیتیرمز
اولدوز تک اوستومه سپه‌له‌ن ای قار.
گئتدی قوللاریم‌دان کوچه داواسی
منیم دردلریمین آیاقلاری وار.

سونرا نه اولدوسا، یادیما گلمیر.
شعیریم هجالارا بؤلونور بئله...
بلکه ده، خوشبختیک، خبریمیز یوخ
یاغیش سحره‌جه‌ن یاغسین شهره.

سنی همیشه‌لیک آتیب گئدیرم
یادلارا دوغمایام، دوغمایا یادام
قاچدیم منی سئوه‌ن گؤزلردن داها
سلام دار آغاجی، علئیکوم سلام.

توتدوم ییخیلماغا قورخدوغوم یئردن
سونرا واخت دایاندی، زامان دایاندی
قیش اولوب اوستومه نیه گلمیسه‌ن؟
قاییت ساهمانا سال بو کایناتی.