کولت. آذ رعنا زارعنین "شاهگؤلونم‌ده قار یاغیر" آدلی شعیرینی تقدیم ائدیر:

شاهگؤلوده قار یاغیر

سرچه‌لر بارماقلاریمین اوجون‌دادیر

آیاقیالین اوچور دوشونجه‌م

همه‌ن او ائوده‌سه‌ن

گؤلون اورتاسین‌داکی رستورانا باخیر پنجره‌ن

سن باشقا گؤزلسه‌ن

قارغالارین قوجالماغینی

ترک ائدیلمیش بالاجا قاییقلاری

قار آلتین‌دا دونان پشمک آغاجلارینی

داها یاخشی گؤردویون اوچون

شاهگؤلوده قار یاغیر

گونئی سویوغون‌دان دونان آغاجلارین بیرییه‌م

قوللاریم‌دا اؤزگورجه‌سینه هسرت وار

و بئله‌جه منه‌م، پنجرن‌دن آسیلان بوز پارچاسی.

بهار نه بؤیوک قورخودور!

شاهگؤلوده قار یاغیر

بؤیوک دده‌م کورسو قوروب فوواره‌لرین اولدوغو یئرده

اوشاقلیغیم بوز اوستون‌ده سوروشور

ننم قاریئمیشانی داغی‌دیر گلیب گئتمه‌یه‌نه

آتام شهریار اوخویور

من قاردان آدام،

قاردان قادین،

قاردان آزادلیق یاپیرام

سنه بنزییر

اصلین‌ده بوتون گؤزلوکلر سنی گؤرسه‌دیر

شاهگؤلوده قار یاغیر

نقطه نقطه اویناییر بئینیم‌ده آنیلار

دیزاین ائدیره‌م سنی ائویم‌ده

یوخلوغونو کورویوره‌م دامدان

پنجره‌نه باخیر تبریز

و منیم دوستاق دیواریما

جورابسیز اوشویور آسیلمیش آرزولار

فیرلانیرام سس‌سیز

دمپاییلریم… آغ!

دوشونسه‌نه!

نه اؤزگور هیجان‌دیر

شاهگؤلوده قار یاغیر…

– ائوده، حیطده گئییله‌ن باشماق