کولت. آذ آذربایجانین سئویله‌ن شاعری ایبراهیم ایلیاسلینین "گئتسین" ردیف‌لی شعرینی تقدیم ائدیر:

گل سنه بیر یالان اویدوروم، کؤنول،

آدینا آلدانیب یاشا دا، گئت‌سین.

ان بؤیوک یالانمیش دوغرو دئییله‌ن،

دوغروچو اولماغی بوشلا دا گئت‌سین.

دوستا یالان دانیش، یارا یالان ده،

داغا دره سؤیله، قوشا ایلان ده.

باخیب اولمازلارا: بودو اولان، - ده،

اوخونو داشلارا توشلا دا، گئت‌سین.

تپیل یارغانلارا، چکیل چاللارا...

بویلان مزه کیمی قیل و قاللارا.

چوروک ماتاهینی بورو شاللارا،

به-به‌نه‌ن آلینسین، خوشا دا گئتسین.

نه گؤزل توخونوب فلیین تورو؟ -

آدام اؤزو قاچیر آغزینا دوغرو.

ایچین‌ده قولدوردو، چؤلونده اوغرو،

ایچینی-چؤلونو خیشلا دا گئت‌سین.

عؤمور دئییله‌نی قیلیقلا، یانلا،

فانی‌ده اویون قور جیسیمله، جانلا.

بیر زامان قاپینا گئرچک یالانلا

قوشامی گلمیشدی؟ - قوشا دا گئتسین!