کولت. آذ خلیل رضا اولوتورکون "ائشیتسه‌م گلیرسن.." آدلی شعیرینی تقدیم ائدیر:

ائشیتسه‌م گلیرسن، دؤنرم یئله،
اؤپره‌م مبارک قده‌ملرینی.
ایچره‌م بنؤوشه کیرپیکلرین‌دن
آسیلان میرواری شبنم‌لرینی،
اؤپره‌م مبارک قده‌ملرینی.

ائشیتسه‌م گلیرسن، اوچارام، اینان،
پنبه بولودلارلا قوجاقلاشارام.
آچارام کؤکسومو یئددی ایقلیمه.
دلی چایلار کیمی آشیب-داشارام.
پنبه بولودلارلا قوجاقلاشارام.

ائله بیر گولسن کی، عمر باغیم‌دا
سنی نفسیمله بسلمیشه‌م من،
غنچه باغلاچی‌سان گؤز قاباغیم‌دا،
سنی دان یئرین‌دن سسلمیشم من.
سنی نفسیمله بسلمیشم من.

ائشیتسه‌م گلیرسن، چیخارام یولا،
بوتون یوللار بویو گوللر اکره‌م،
ایکیمیز بیر قلب‌ده یاشایاق دئیه،
سنه قلبیم بوی‌دا بیر ائو تیکره‌م،
بوتون یوللار بویو گوللر اکره‌م.

من – ائو‌م، سن منیم اود-اوجاغیم‌سان،
باغبانام، سن منیم بارلی باغیم‌سان
من داغ بولاغییام، سن بولاق‌لی داغ،
دونیادان ان بؤیوک اوماجاغیم‌سان.

اورییم او قدر یانیق‌دیر کی،
آز قالا قانادلی بیر قوشا دؤنه‌م،
سنین تئللرینه دوزولمک اوچون،
یاغیشا، زومروده، داش-قاشا دؤنه‌م.
آز قالا قانادیه بیر قوشا دؤنه‌م.

گورشادلا، باهارلا، یا قاتارلا گل!
هر بیر قدمینی کؤنلوم ایزلییر.
یوز-یوز، میلیون-میلیون دالغالارلا گل،
سنی ساحل‌ده بیر قایا گؤزلییر،
هر بیر قده‌مینی کؤنلوم ایزلییر.