کولت. آذ اوستاد شهریارین اؤز سسی ایله "اینس و جین" آدلی شعیرینی تقدیم ائدیر:

بار ایلاهی! سن بیزه وئر بو شیاطینی‌دن نجات،

اینسانین نسلین کسیب، وئر اینسه بو جین‌دن نجات.

بیزدن آنجاق بیر قالیرسا، شیطان آرتیب مین دوغوب،

هان‌سی رؤیادا گؤروم من، بیر تاپا مین‌دن نجات؟

بئش مین ایلدیر بو سلاطینه گیریفتار اولموشوق،

دین ده گل‌دی، تاپمادیق بیز بو سلاطین‌دن نجات.

بیر یالانچی دین ده اولموش شیطانین بیر مؤهره‌سی،

دوغرو بیر دین وئر بیزه، وئر بو یالان دین‌دن نجات.

هر دعا شیطان ائدر، دونیا اونا "آمین" دئیر،

قوی دعا قال‌سین، بیزه وئر سن بو "آمین"دن نجات.

ارسینی تندیرلرین گوودوشلارین‌دا اویناییر،

کیمدی بو گوودوشلارا وئرسین بو ارسین‌دن نجات؟

یا کرم قیل، کین‌لی شیطانین الین‌دن آل بیزی،

یا کی، شیطانین اؤزون وئر بیرجه بو کین‌دن نجات.

اؤلدورور خلقی، سورا ختمین توتوب، یاسین اوخور،

بار ایلاهی، خلقه وئر بو حوققا یاسین‌دن نجات.

شوروی‌دن ده نجات اومدوق کی، بیر خئیر اولمادی،

اولماسا چای ساندیغین‌دا چای، گله چین‌دن نجات.

من تویوق تک اؤز هینیم‌ده دوستاغام ایللر بویو

بیر خوروز یوللا، تاپام من بلکه بو نین‌دن نجات.

شهریارین دا عزیزیم، بیر توتارلی آهی وار،

دوشمنی اهریمه‌ن اولسون، تاپماز آهین‌دن نجات