بو گون گؤرکملی شاعریمیز زلیمخان یعقوبون آنادان اولدوغو گون‌دور. یاشاسایدی، رحمت‌لیک ۷۰ یاشینی قید ائد‌جکدی. مکانین جننت اولسون، اوزولونماز شاعر!

کولت. آذ زلیمخان یاقوبون "بو سیرری بیر سن بیل، بیر ده من بیلیم..." آدلی شعیرینی تقدیم ائدیر:

سن الله، قیراغا چیخماسین بو سؤز،
بو سیرری بیر سن بیل، بیر ده من بیلیم.
کیمین‌سه ائوینی ییخماسین بو سؤز،
بو سیرری بیر سن بیل، بیر ده من بیلیم.

اؤلرمی دیلین‌دن، سؤزون‌دن اؤپ‌ن،
کیمین باخیشیی‌دی گؤزون‌دن اؤپ‌ن؟
کیمین دوداغییدی اوزوندن اؤپن،
بو سیرری بیر سن بیل، بیر ده من بیلیم.

سئوگی عمورلوکدو، بیرجه آن دئییل،
سن‌سیز بیر جان‌سیزام، جانیم جان دئییل.
اللهین اؤزو ده سیرر آچان دئییل،
بو سیرری بیر سن بیل، بیر ده من بیلیم.

دیلیم نه دانیش‌دی، الیم نه دئدی،
ایچیم نه قایناتدی، چؤلوم نه دئدی.
حیات نه سؤیله‌دی، اؤلوم نه دئدی،
بو سیرری بیر سن بیل، بیر ده من بیلیم.

سن یانار اولدوزسان، من دوغار آیام،
سن آخار چئشمه‌سه‌ن، من دلی چایام.
کیملره سووقاتام، کیملره پایام،
بو سیرری بیر سن بیل، بیر ده من بیلیم.

سن شادلیق ایستدین، فرمانین اولدو،
سن علاج ایستدین، درمانین اولدو.
زلیمخان نئچه یول قوربانین اولدو،
بو سیرری بیر سن بیل، بیر ده من بیلیم...