آنا صحیفه ادبیات |
کولت. آذ گونئی آذربایجانلی شاعر میرزه علی معجز شبسترلیاون قلهمیندن داها بیر نمونهنی تقدیم ائدیر:
کاش سن ده اوشیئیدین بئله مخلوق کیمی
تا بیلئیدین نه چکیر قیش گونی عریان الله
دئمیرم بو لوته بیر دست لباس ائیله عطا
ایکی آرشین شیله وئر ائیلیه تومان الله
وئرمیسن بو آجا اوتوز ایکی دیش مثل صدف
اولماسا دن نیه لازمدی دگیرمان الله
گؤرسه نیر دایرۀ عصمتی بو عاجزه نین
گولمه ییم من نئجه ای خالق منان الله
کون حوایه باخیب گولدی تمام حوریلر
چون سویوندوردو اونو خازن رضوان الله
باغ رضواندان اؤتوردون ائشیگه تومانچاق
کاش آدم یئمیئیدی ایکی بوغدان الله
نه گوناه صاحبیدی بو ایکی یاشیندا اوشاق
قارنی آج، پالتاری یوخ، آی سنه قوربان الله
بؤرکو یوخ، باشماغی یوخ، پیکری عریان بیکس
دولانیر کوچه و بازاری پریشان الله
سنی رزّاق بیلیب، اَکدی بونو بیچاره کیشی
بیلمدی آخر آجیندان وئره جک جان الله
ای وئرن بیر صلواته ایکی مین قصر طلا
ائوین آباد اولا ای صاحب احسان الله
او عمارتلری سات تؤک فقرانین جیبینه
وئر او پولدان منه ده بیر ایکی تومان الله
ایکی بوغدانی یئیب آدم ایکی مین ایل اوّل
هله ده ائیلیر رسوای اونو قرآن الله
ایسته ییردی بیری مسجدده خدادن یورغان
گؤردوم آغلار، دئیه ر: ای قادر منّان الله!
دئدیم آخماق کیشی گونده سنه بیر دانه لاواش
وئره بیلمز، نئجه وئرسین هله یورغان الله
یا گرک قویمویاسان آدینی رحمان رحیم
یا گرک ائیلیه سن عدلیله دیوان الله
بالی خلق ایله میسن یوخسولی چاتلاتماق ایچون
دوزدو بو سؤز دئمیرم من سنه بهتان الله ...
تاریخ
2020.02.16 / 23:32
|
مولف
Axar.az
|