- آغريماياجاق؛ آجيماياجاق؛ اينجيمه‌سی اولماياجاق!

- آغريياجاق؛ زوققولداياجاق؛ قانى دورماياجاق!

اونو آنام، بونو آتام دئييرميش. آنام كسديريلمه‌ييمدن يانا ايميش؛ آتام كسديريلمه‌ييمى ايسته‌ميرميش.

سونرا منى گؤتوروب گئدیر آنام.

...ساللاخخانانین دله‌یی آناما "اؤنجه اؤزونو كسديره‌سن گرک؛ اؤزونو کسدیرمیسن؟ " دئيه سورور.

آنام باشییلا جواب وئریر، "بلی" دئییر.

"آچ ، باخیم " دئییر آناما!

آنام آچیر. دللک باخیر!

-هاچان کسدیریبسن؟

-اون سککیز یاشیمدا، باش کندده اؤیرنجی اولاندا ... اؤزومو لاغا قویوردولار؛ گۆلوردولر. ... اره

آلمایاجاقلاریندان قورخوردوم. ... بیرگون ... بيرگون اۆلگۆجو گؤتوردوم؛ دیبیندن کسدیم. اؤزوم کسدیم!...

قانی آخیردی. یایلیغیمی باشیمدان آچیب یایلیغیما بوکدوم؛ ایکیسینی ده بیردن آتدیم!

دللک، آنامی بیر ایکی ساعات دانیشدیریب آنامین کسیلن یئرینه باخمیش. " یاخشی کسمیش‌سن" دئمیش. "ائله بو قیزی دا اؤزون کس" دئمیش!

-آنجاق اولگوجله آتدیرما. قیز اوشاغی دیر؛ یئری قالار! سونرا الینیزه ایش وئرر!

کفن کیمی آغ بیر دون گئیدیریب اوزادیرلار؛ یوخلادیرلار منی.

دللک، نام نازیک گؤرونمز جییه‌نی حالقالاییب آناما وئریر.

- " من توتوم؛ سن باغلا! لاپ دیبیندن باغلا! قورخما؛ بیر تیکه اتدیر؛ آجیسی، آغریسی اولمایاجاق؛ یوخلاییبدی. "

دللک توتور؛ آنام، سوچسوز محکومون بوینونا دار ایپینی سالار کیمی دیبدن بوغور.

جییه‌نین بیر اۇجو دله‌یین الینده بیر اوجو آنامدا قالیر. او آندان سونرا هر گون بیراز داها چکیب

سیخیرمیشلار. بیراز دا بوغورموشلار. "گون کئچدیکجه قارالیب قارالیب دیبیندن قوپاجاق " دئمیش‌میش دللک.

یوخوم آغیر اولور. اوزون ایللر یاتیرام! یۇخودا ایکن آنامین حاقلی اولدوغونو سانیرام. آغریمیر؛ آجیمیر؛ اینجیمه‌سی اولمور.

بیر گون اؤلدويومو مو سانميش ننه‌مين يانيقلى اوخشاماسينا آييليرام يوخودان. آییلینجا آغلاییرام. آغزيمدان قان گلیر. بوغازیمدا دیلیمی بوغان جییه یاراسی زوققولداییر. آجيم، ايچیمی چکدیریر. آغلاماغیمین سسینه آنام دا اویانیر!

اویانینجا دیلیمی بوغان گؤرونمز جيينه آچیر دیلیمین بوینوندان. . . .

ایندی آناملا اوبا اوبا آختاریریق:

-سیز، بیر نارین گوللو، سیرمالی یایلیق آراسیندا قانی آخان دیلی گؤردونوز مو؟!