Axar.az
یوخاری
8 آپرئل 2020


معصوم و دیل افروز داستانیندان بیر بؤلوم

آنا صحیفه ادبیات
12 Punto 14 Punto 16 Punto 18 Punto

معصوم ،دیل افروز عشقیندن گئجه _گونوز آغلاییر. دیل افروز دا معصوملا قرار قویموش کیمی اؤزون ووروب لال اولماغا.

واخت او واخت اولوب کی خوجا عزیز یوک باغلاییب یولا دوشدو. آیلار - ایللر یول گئتدی . حکیم ، سؤیداگر پالتاریندا گئتدی چیخدی چین پادشاهی نین توپراقلارینا.

چین پادیشاهی نقدر چالیشیردیسا قیزینین دیلین آچدیرا بیلمه دی. اویودو کی امر ائله دی اؤزگه توپراقلاریندان منیم اؤلکه مه هئچ کیمی بوراقمایین، چونکو گلیب منیم قیزیمین لال اولماغین گؤروب منی لاغا قویارلار.

خوجا عزیز سرحددی کئچنده اونو قویمادیلار. خوجا عزیز گؤتوروب گؤرک یول وئرمه ینلره نه دئدی :

بیر یانیم چَرحوووض ، سونالار اوزر
یول وئر گمیچی یول وئر، قفلم کئچسین
بیر یانیم گولشانلیق بولبوللر گزر
یول وئر گمیچی یول وئر قفلم کئچسین

یؤنومو چئویره رم شاهلار شاهینا
صیدقیمی باغلارا قیبله گاهینا
بیر نامه یازارام چین پادیشاهینا
یول وئر گمیچی یول وئر قفلم کئچسین

گول کیمی مصیمیم سارلدی سولدو
توتو کیمی دیل افروز چین ده لال اولدو
کیم بیلیر خوجا عزیز گمین قرق اولدو
یول وئر گمیچی یول وئر قفلم کئچسین

خوجا عزیزسؤزونو تاماملاییب. چوخ یالواردی ، یاپیشدی آمما یول وئرمه دیلر و قویمادیلار. اوندا خوجا عزیز گؤتوروب چین پادیشاهینا بیر کاغیذ یازدی کی : من بئله - بئله بیر سؤیداگرم ، مالیم ، دؤولتیم حددینی آشیب. اؤزوم ده قوجالمیشام ایسته ییرم گلم سنین توپراقلارینا. اؤلنده ده مالیم دؤولتیم قالسین سنه.

چین پادیشاهینا تاماح گوج ائله دی ، ایجازه وئردی کی خوجانی بوراقسینلار . خوجانی بوراقدیلار چین توپراقلارینا. خوجا عزیز گئدیب قفله- قاطاری آچدی. اورانین دا قایداسی بئله ایدی کی گرک پادیشاهین آداملاری او مالا اؤنجه قیمت قویاردیلار سونرا سؤیداگر اونلاری ساتا بیلردی.

چین پادیشاهی بیر دسته آدامینان خوجا عزیزین مالینا باخمایا گلدی. مالا قیمت قویوب قاییداندا ، خوجا عزیز :
ائی شاه ائشیتمیشم کی سنین قیزین لال اولوب. من حکیمم آپارمنی اونو یاخشی ائیله ییم.
شاه خوجانی گتیردی اؤز اوتاغینا دئدی :

اگر قیزین دیلین آچسان قیز سنیندی، آمما آچا بیلمه سن باشین منیمدی!

خوجا عزیز راضی اولدو. آمما عزیزین چوخاسینین آلتیندا بالاجا بیر جوره وار ایدی . عزیزی آپاردیلار قیزین یانینا، خوجا عزیز گؤردو قیز او قدر گؤزلدی کی گل گؤره سن. خوجا اون گؤرن کیم تیر _ تاپ ییخیلدی یئره. بیر تهر دوروب گلدی قیزین یانینا. قیز گؤردو کی بو هئچ حکیمه اوخشامیر. خوجا بوردا یاواشجا سازی چیخاردیب دئدی :

قیرخلارین الیندن ایچیبدی تاسی
مؤولایا باغلیدی یقین ایخلاصی
من عزیزم اول مصیمین آتاسی
گؤنده ریبدی سؤیگولوسو یانینا

خوجا سؤزو قورتاراندان سونرا قیز دئدی :

حکیم سن سؤزونون آخیریندا بیر مصیم سؤزو دئدین ، او کیمدی؟

خوجا قیز آلدادیب دئدی :

قیزیم مصیم بیزیم یئرده بیر داغدی.

خوجا قیزین نبضین الینه آلدی کی ، گؤرسون اونون دردی ندیر. بو یئرده قیز آلدی گؤرک نه دئدی :

ال وورما منیم نبضیمه
یوخدو منده جان آی حکیم
البتدهکی سن بیلیرسن
بو دردی پینهان آی حکیم

اوزاقدیر یوللار آراسی
قورباندی قاشیم قاراسی
اولوبدور مصیم یاراسی
سینه مده نیشان آی حکیم

هر عاشیق مطلبین دیلر
حاقدان منه یئتمیر ثمر
مصیمدن وئرگینن خبر
جان سنه قوربان آی حکیم

دیل افروزا گلدی صدا
باشیمدان هئچ گئتمز سئودا
دون گئجه گؤردوم یوخودا
حالیم پریشان آی حکیم

خوجا هئی داندی ، قیز دا مصیمدن دئدی. سونوندا خوجا قیزا دئدی منه بیر بارداق سو وئر سنه درمان وئریم یاخشی اول !

قیز سو گتیردی ، خوجا اوزویو بارداغا سالدی ، قیزا وئردی.
قیز باخیب گؤردو کی بو مصیمه وئردیگی اوزوکدو.
بئله لیکله قیز بیلدی کی بو خوجا مصیم طرفیندن گلیب و حیس ائله دیکلری دوغرودو. . .

قایناق: آذربایجان فولکلور کلیاتی-۱۰-جو کیتاب

تاریخ
2020.03.16 / 21:03
مولف
Axar.az
شرح لر
دیگر خبرلر

تورک شاعری ناظیم حیکمتین بورسا هبسخاناسین‌داکی خاطره‌لرین‌دن بیری

ناز ایله ساللانه-ساللانه گل‌سین! - شئیر

حمید هریس‌چی‌دن: "شمس تبریزینین شعیری"

بودور گلدى باهار فصلى...-شعیر

اؤل‌نلری ساغ گؤره‌سه‌ن - شئیر

آی اوزلو نیگاریم، کیمه مئهمان اولاجاق‌سان؟- غزل

فولکلوروموزدان- امیر یئمن‌ین ناغیلی - ایکینجی بؤلوم

اؤز یالانلاریملا ایناندیردیم اؤزومو - شعر

گولوشونه قوربان اولوم- شعیر

نه گلیب‌دی خانچوبانه کی، بو قیش موغانه گلمز؟- قزل

خبر خطّی
 
Axar.az'da reklam Bağla
Reklam
Bize yazin Bağla