کولت. آذ روقییه ابدی‌لی (سازاق)این شعیرینی تقدیم ائدیر:

یاشایا بیلمیرسن، منی یاشاما،
آلیب‌سان جانی‌می، داها بوشلاما،
ایللر سن یاشادین، قلبیم بوش اما،
بو یاساق سئوگینی بیتیر، قوی گئدیم،
من‌دن گؤزلرینی گؤتور، قوی گئدیم.

نازیم‌دان ناز آلیر آلا گؤزلرین،
چیرپینیر گؤزوم‌ده قالا، گؤزلرین،
یالواردیم اؤمورلوک قالا گؤزلرین،
قالمادین، سونونا یئتیر، قوی گئدیم،
من‌دن گؤزلرینی گؤتور، قوی گئدیم.

اؤزوم‌دن چیخمیشدیم، اؤزوم دئییلدیم،
سئوگین‌دن مله‌ییب اؤزوم اییلدیم،
ایچیم‌ده سیزلاییب قمله یئییلدیم،
توتورمو اوریین؟ آتیر! قوی گئدیم،
من‌دن گؤزلرینی گؤتور، قوی گئدیم.

گؤزومو یوللارین اللرین‌دن آل،
اتری‌می باغچانین گوللرین‌دن آل،
گونومو یاشاییب ایللرین‌دن آل،
سازاق‌سیز ایزلری ایتیر، قوی گئدیم،
من‌دن گؤزلرینی گؤتور، قوی گئدیم.