آنا صحیفه ادبیات |
کولت. آذ زلیمخان یعقوبون "بیز نیه سئومیک بیر-بیریمیزی؟!" آدلی شعیرینی تقدیم ائدیر:
یئر گؤیو، داغ داغی، داش داشی سئودی،
تانری ناخیش ووردو، نقاشی سئودی.
گؤز گؤزه بویلاندی، قاش قاشی سئودی،
بیز نیه سئومیک بیر-بیریمیزی؟
چمهنلر تورپاغا خالی چکیرسه،
خالیدا یاشیلی، آلی چکیرسه،
آری چیچکلردن بالی چکیرسه،
بیز نیه سئومیک بیر-بیریمیزی؟
اولدوزلار سایریشیب گؤز وورور آیا،
چئشمهلر چاغلاییب تؤکولور چایا.
سئوهنلر گلیرسه هر گون دونیایا،
بیز نیه سئومیک بیر-بیریمیزی؟
گول شئهدن گوج آلیر، مامیر قایادان،
کؤز اوددان قیزاریر، چیچک حیادان،
سوزولوب گلیرسه کؤکدن، مایادان،
بیز نیه سئومیک بیر-بیریمیزی؟
عؤمور گؤز قیرپیمی، فورصت آزدیسا،
کؤنول سون نفسده سینان سازدیسا،
اوچوب الیمیزدن گئدن یازدیسا،
بیز نیه سئومیک بیر-بیریمیزی؟
عمرون هم سئوینجی، هم آهی وارسا،
پروانه یانغیسی، شام آهی وارسا،
آدمین جنتده تاماهی وارسا،
بیز نیه سئومیک بیر-بیریمیزی؟
یاغیش گؤزللرین اؤپور اوزونو،
داملا پیچیلتییلا دئییر سؤزونو،
شلاله قایادان آتیر اؤزونو،
توفان داغی سئویر، دالغا دنیزی،
بیز نیه سئومیک بیر-بیریمیزی؟...
تاریخ
2020.05.22 / 09:58
|
مولف
Axar.az
|