کولت. آذ آشیق علسگرین "داغلار" قوشماسینی تقدیم ائدیر:

باهار فصلی، یاز آیلاری گلن‌ده
سوسنلی-سونبول‌لو، لالالی داغلار
یوخسولو-اربابی، شاهی-گدانی
توتماز بیر-بیریندن آرالی داغلار

خسته اوچون تپه‌سین‌ده قار اولور
هر جور چیچک آچیر لالزار اولور
چشمه‌سین‌دن آب حیات جار اولور
داغی‌دیر مهنتی-ملالی داغلار

یازین بیر آییدی - چوخ یاخشی چاغین،
کسیلمز چشمه‌ندن گؤزل ییغناغین،
آختارما موتالین، یاغین، قایماغین
زنبور چیچییندن بال آلی داغلار!

یایین اولینده دؤنورسن خانا،
سون آیدا بنزرسن یتکین بوستانا؛
پاییزین زهمری قویار ویرانا -
داغیدار اوستون‌دن جلالی، داغلار.

گاه‌دان چیسکین تؤکر، گاه دومان ائیلر،
گاه گلیب-گئدنی پشیمان ائیلر،
گاهدان غیضه گلر، ناحاق قان ائیلر،
دینشمز حرامی، حالالی داغلار.

آغ خلت بورونر، زرنیشان گئیمز،
هئچ کسی دیندیریب کئیفینه دیمز،
سردارا سؤز دئمز، شاها باش ایمز،
قودرت‌دن سنگرلی-قالالی داغلار.

کؤچر ائللر، دوشر سن‌دن آرالی،
فیرقتین‌دن گول-نرگیزین سارالی،
علسگر مجنون تک یاردان یارالی،
گزر سن‌ده دردلی، نالالی، داغلار.