کولت. آز دیل‌سوزون "چاغیرما منی" آدلی شئیرینی تقدیم ائدیر:

بو قدر اورک‌دن چاغیرما منی

بو قدر اورک‌دن چاغیرما منی،

بیر گئجه قفلته‌ن گله بیلره‌م.

گؤرره‌م، یاتمامیش، اویومامیش‌سان،

سئوینج‌دن قاپین‌دا اؤله بیلره‌م.

بلکه ده حیاتا تزه باشلارام،

ایچیم‌ده کول‌لنه‌ن قور آلوو آلیر.

ایسته‌سه‌ن گئتمره‌م، کؤله‌ن اولارام،

بلکه ده سئورسه‌ن منی، کیم بیلیر.

قال دئسه‌ن، داغلارجا سئوره‌م سنی،

بیر دنیز اولارام آیاقلارین‌دا.

عشق - بو، هسرت - بو، هئچ بل‌لی اولماز،

قالخیب دایانارام دوداقلارین‌دا.

یا دا اونودارام کیم اولدوغومو،

یادیما سالمارام آدی‌می بئله.

بلکه ده چیلدیریب، دلی اولارام

سنه قوووشمانین هیجانییلا.

عشق - بو، هسرتین‌دن اؤله بیلره‌م،

نه ساخلار یولون‌دان، سؤیله، سئوه‌نی.

بیر گئجه قفلته‌ن گله بیلره‌م،

بو قدر اورک‌دن چاغیرما منی.