آنا صحیفه ادبیات |
قایناق: ملائکه نظری
بیر گون امیر یئمن ائوده دییلدی. آنا ایکی دنه گیلیم، چوخ چیرکیلی، وئردی قیزا دئدی:
-آپار یو گتیر! قیز آپاردی هرنهقدر
چالیشیردی تمیز اولموردولار. داش ایله سورتوردو، تمیز اولموردو. اوتوروب آغلاییردی اؤز حالینا. بیردن امیر یئمنین سؤزو یادینا دوشدو! اوزویو لاخلاتدی، امیر یئمن اؤزونو یئتیردی! گلدی قیزا دیلدارلیق وئریب، بیر دوعا اوخودو، گیلیملر تمیزلشدی. قیز سئوینجک گؤتوروب آپاردی ائوه. آنا گؤردو، دئدی: بو ایش سنین ایشین دییل. «هئلی دیر، فئلی دیر/ امیر یئمنین فئلی دیر».
آنا هر گون بیر ایش ایله بو قیزی اینجیدیردی. بیر گون ده، قیزا اوچ-دؤرد دنه باردان وئریب دئدی:
-گئت للک ییغ گتیر، سیزه یورغان-دؤشک توتاجاغام.
قیز گؤتوردو دوشدو یولا، گئتدی چایین قیراغینا کی، قوشلار ییغشاردی. اورانی- بورانی آختاردی، دولاندی، بیر آووج للک تاپا بیلدی. بیلمیردی نئیلهسین. انا دئمیشدی للکسیز گلمه! آغلاییب للک آختاریردی تاپا بیلمیردی. بیردن امیر یئمن یادینا دوشدو، اوزویو لاخلاتدی، اوغلان گلدی، دئدی:
-هه نوولوب؟!
-آنا دئییب للک ییغام، بیزه یورغان- دوشک توتا.
-ییغانمادین؟!
-بیر آووج!
-بیلیرسن نه دئسن للک ییغا بیلرسن؟!
-یوخ بیلمیرم
-دئه:
«ییغیشین قوشلار ییغیشین قوشلار، امیر یئمنین تویودور/ سیلکیلین قوشلار سیلکیلین قوشلار، امیر یئمنین یاسیدیر» قیز سئوینجک باشلادی اوخودو. بوتون قوشلار ییغیشیب بیر یئره، سیلکهلهنیب او قدر للک تؤکدولر کی، امیر یئمن ده قیزا مدد وئردی للکلری ییغدیلار باردانا، آپاردیلار ائوه.
آنا گؤردو، گئنه باشین توولاییب، دئدی: «هئلی دیر، فئلی دیر/ امیر یئمنین فئلی دیر».
تویلارینا آز قالیردی، بیرگون امیر یئمن قیزا دئدی:
-باخ گؤزلیم! آنام سنی یوللایاجاق خالام گیلین کندینه کی، قاوال آلیب گتیرهسن. سنی یوللاییر اوردا سنی اؤلدورهلر.!
قیز تیترهدی! امیر یئمن قیزی باسدی باغرینا دئدی:
-قورخما! من کی وارام! دئیهجهیم نئیلهیهسن.
قیزا اؤیرتمهلیلری اؤیرتدی.
آخشام باشیدیر، آنا قیزا دئدی:
-تویوزا آز قالیر هئچ چال-چاغیریمیز یوخ. گئت امیر یئمنین خالاسیندان قاوالی آل گتیر!
-امیر یئمن ده گلسین.
-امیر یئمن نهیه؟! چوخ اوزاق دییل!
قیز قورخا- قورخا دوشدو یولا. یولدا گؤردو بیر آتین قاباغینا سوموک تؤکولوب، بیر ایتین قاباغینا یونجا. سومویو تؤکدو ایتین قاباغینا، یونجانی قویدو آتین قاباغینا. بیرآز دا یئریدی. آچیق گیلیملری گؤردو، اونلاری بوکدو. بوکوک گیلیملری ده آچدی. آچیق قاپینی اؤرتدو، اؤرتوک قاپینی آچدی. بیرآز دا یئریدی. بیر چالی گؤردو. دئدی:
-آی آللاه نه گؤزل ایینه- سانجاق دیر، بئکار اولایدیم یاخا- برهمه سانجایدیم.
بیر آز گئتدی، بیر چای گؤردو، دئدی:
-آی آللاه نه گؤزل آخار سودو، بئکار اولایدیم ال- اوزومو یویایدیم.
بیرآز یئریدی، چاتدی قاپییا. چالدی، خالا گلدی. خالایا دئدی:
-امیر یئمنین آناسی یوللاییب قاوالا.
-آللاه موبارک ائلهسین! قاوالی سن آپار، بیز ده صاباح گلیریک.
-ساغ اول خالا.
-دؤز گئدیم ایچری دامدان گتیریم.
"امبریمن دئمیشدی کی، او گئدیر پیچاق گتیره سنی اؤلدوره. قاوالی قاپینین باشیندان گؤتوروب قاچاجاقسان." قاوالی گؤتوردو قاچدی. خالا گلدی قیشقیردی:
-آی سو، توت!
سو دئدی: -او منه دئییر آخار سو، سن ایرین چیت اونا گؤره؟
-آی چالی، توت!
-او منه دئییر ایینه- سانجاق، سن دئییرسن چالی اونا گؤره؟!
-آی آچیق قاپی، توت!
سن منی ایللر بویو آچیق ساخلامیشدین او اؤرتدو اونا گؤره؟!
-آی آت، توت!
سن سوموک تؤکموشدون او یونجا وئردی اونا گؤره؟!
-آی ایت، توت!
سن یونجا وئرمیشدین او یئمهلی سوموک وئریب اونا گؤره؟!
توتمادیلار، قیز آرادان چیخیب قاچدی. گلدی ائوه، آنا دئدی: اوغول اؤلهسن سنی! «هئلی دیر، فئلی دیر/ امیر یئمنین فئلی دیر».
توی گونو باشلاندی چال- چاغیر، اویناماق، گئجه اولدو. آنا، خالایلا قیزی سالدیلار آیری داما، کیلیتلهدیلر. خالانین قیزینی آپاردیلار اوتاغا! امیریئمن دئدی:
-من بونو ایستهمیرم. من توکلوجهنی ایستهییرم.
آناسی دئدی:
-اونو تانیمیریق. سیز اوشاق اولاندان، بیز ایکی باجی، سیزی بیر- بیریزه دئدیکلی ائله¬میشیک. آیری یولون یوخ. خالاقیزینی آلاجاقسان یوخسا توکلوجهنی اؤلدوررم!
امیر یئمن کی آناسینین داش اورهییندن خبری واریدی. اوزده راضی¬لاشیب. یاخشی دئییب، آمما دئدی گرک توکلوجه ده گله بیزیم یانیمیزا.
خالاسی چیغیردی کی، اولماز!
امیر یئمن دئدی او گلمهسه، اؤلسم ده سنین قیزینی آلمارام. ناچار قالیب قیزی دا گتیردیلر.
داوامی وار...
تاریخ
2020.04.06 / 19:28
|
مولف
Axar.az
|