قالخیب چنلی بئلدن دوشموشم يولا

ارضرومون بازارينا گلمیشم
اجل کؤینه‌یینی گیریب اینیمه
جنگ_جیدالین گوزارینا گلمیشم

ایلشمیشدیم اوردا گوفتاری گئچدى
قالخیب کؤنول مورغو دولومو ایچدی
تئللى خانیم نامه‌ن گلدی یئتیشدی
بیر گؤزه‌لین ایلقارینا گلمیشم

دمیرچی اوغلو یالان گلمز دیلینه
موخننت یاپیشار ،چتین الیمه
میصری قیلینج باغلامیشام بئلیمه
ترلانلارین تاوارینا گلمیشم.

دمیرچی اوغلونون سسینه تئللى خانیم ائیوانیندان باخیب گؤروب بیر اوغلاندی ساز چالیب اوخویور. تئللى خانیم کوراوغلویا نامه گؤندرمیشدی اؤز _ اؤزونه دئدی کوراوغلودور منی آپارماغا گلیب. کنیزلریندن بیرین یانینا جاغیریب دئدی：

آی ،،قیز،، گئت او آشیغا دئ صاباح باغیما گزمه‌گه چیخاجاغام منیم گولشن باغیما گلسین.

قیز (کنیز) گلدی دمیرچی اوغلونون یانینا دئدی آی آشیق تئللى خانيم دئيیر صاباح گلین منیم گولشن باغیما،

دمیرچی اوغلو مطلبی آنلاییب قاییدیب قاری‌نین ائوينه گئتدی،آخشام اولدو یاتیب، صاباح دوروب عرب آتی چکیب یهرله‌دی مینیب تئللی خانمین گولشن باغینا یئتیشدی،

گوروب تئللى خانيم كنيزلري ايله گولشن باغیندادیر،

آتی اونا یاخینلاشدیردی،الینی آتیب تئللی خانیمی عرب آتین ترکینه چکدی سوروب باغدان چیخدی،

اوطرفدن قیزلار اؤزلرین جعفر پاشیا یئتیردیلر：

دمیرچی اوغلو قیزین تئللی خانیمی قاچریدیب،

جعفرپاشا حؤکم ائیله ییب قوشون آتلاندی،دمیرچی اوغلونون دالیجا دوشدولر،

اوطرفدن دمیرچی اوغلو تئللی خانیمدا ترکینده عرب آتینی چاپیب ارضروم شهریندن آرالانمیشدی،

باخیب دالینا گؤردو قوشون گلیر،آتین باشینی چکیب دوردو !؟
تئللی خانیم دئدی：

بویئرده نیيه ایلندین؟سور آتی گئدک،ایندی قوشون گلر یئتیشر منی ده اولدوررلر سنی ده !!

تئللى خانیم گؤروب دمیرچی اوغلو گئتمک ایسته‌میر گؤتورب گؤرک نه دئدی：

تئللی خانیم

عثمانلی قوشونو گلر قورد کیمی
قاچ گئت،عجم اوغلو، قالما بو یئرده
باشین گئدر،گؤودن قالار یورد کیمی
قاچ گئت عجم اوغلو قالما بو یئرده.

دمیرچی اوغلو
عثمانلی قوشونو گلسه قورد کیمی
اؤلر عجم اوغلو، قاچماز بو یئردن
باشیم گئدسه، گؤوده‌م قالسا یورد کیمی
اؤلر عجم اوغلو گئتمز بو یئردن

تئللی خانیم
قوشون گلیر ایندی سنی توتارلار
قوللارینی دال گردنه چاتارلار
قول ائیله‌ییب حَبَشده ساتارلار
قاچ گئت عجم اوغلو قالما بو یئرده.

دمیرچی اوغلو
قوشوندا گلیب سه،منی توتسالار
قوللاریمی دال گردنه چاتسالار
قول ائیله‌ییب حَبَشده ساتسالار
اؤلر عجم اوغلو، گئتمز بو یئردن .

تئللی خانیم
تئللی خانیم عرضین سنه ائیله‌سین
دیلی دوتمور بئش کلمه نی سؤیله سین
بیرجه ایگید،مین قوشونا نئیله سین
قاچ گئت عجم اوغلو قالما بويئرده

دميرچى اوغلو
دميرچى اوغلو دردين سنه سؤيله سين
شيرين جانين سنه قوربان ائيله سين
يوز مين تولكو بير آصلانا نئيله سين
اؤلر عجم اوغلو گئتمز بویئردن

سؤز باشا چاتدی دمیرچی اوغلو سازدا دئیدییی کیمی دیلده دئدی：

من سنی بئله دالاشسيز داعواسيز آپارسام چنلی بئله كوراوغلو دئيه جک اوغورلاییب گتیریبسن،بو ایگیتلیکدن دییل،گرک قاییدام قوشونلا داعوا ائل يم،سوترا سنى آپارام.

قوشون گلیب یتیشمیشدی، یولون قیراغیندا بیر قالاچا وار ایدی،دمیرچی اوغلو تئللی خانیمی گتیریب او قالایا قویوب آغزینادا بیر داش قویوب اؤزو عرب آتین باشین چئویردی قیلینجی چکدی قوشونا جومولدو، باشلادی قوشونو قیرماغا، دمیرچی اوغلو جعفرپاشانین قوشونو ایله اوچ گون اوچ گئجه جنگ ائیله دی،چوخ آداملاری اؤلدوردو.

داوامی وار