رسول رضانین یارالی کرکوکون خویرات و مانیلری آدلی شئیرینی تقدیم ائدیر:

بیر یانیم موصول‌دور
بیر یانیم اربیل،
بختیمه یازیل‌دی
بو قارا نیسگیل.
چکدییم آغری‌لی
ایللر ایچین‌ده
نه بد گل‌دی قان‌لی،
قادالی بو ایل.

گونئیلر، آی قوزئیلر،
دردیم اودو بوز ائیلر.
گل‌دی آغیر گونلریم –
بیر دردی‌می یوز ائیلر.

باغداددان کاروان گلیر،
دردلی، پریشان گلیر.
کیملر قوربان کسیلیب،
سولاریم آل-قان گلیر.
مسئولون یولو داش‌دی،

یوللار قانا بولاش‌دی.
بیر-بیرینین قنی‌می
ایکی اینسان - قارداش‌دی.

کرکوک اوستو دومان‌دی،
کرکوک اودا قالان‌دی.
کربه‌لا موسیبتی
بونا باخ‌سان یالان‌دی.

اربیله،
یانغین دوش‌دو اربیله؛
هؤجتی کسمک اولماز
داوا-دالاش، حرب ایله.

اربیله،
کاروان گئدر اربیله.
سیررینی ائله ساخلا
نه قارداش، نه ار بیله.

دنیزه،
دولو دوش‌دو دنیزه.
نامرد، علین قوروسون،
نئجه قییدین تبریزه.

دره‌لر،
یاستی، چوخور دره‌لر.
باغ سالمادیم کی، یادلار
مئیوه‌سینی دره‌لر.

بو داغلار،
بو دره‌لر، بو داغلار.
کیمه نئیلمیش‌دیلر
سیندیریلمیش بوداقلار.

آی بولوددان گؤرون‌دو،
یئنه گیزلنر ایندی.
گؤی‌دن بیر دمیر دوش‌دو،
بوتون کرکوک دیک‌سین‌دی.

ترلان اوچدو، سار گل‌دی،
دولوکس‌دی، قار گل‌دی.
ائیوانا کؤلگه دوش‌دو،
دئدیم یاغیلار گل‌دی.