کولت.آذ حمیدرضا حسینینین «گوله‌بتین»‌ادلی حئکایه سینی تقدیم ائدیر:

گون بوْیو چوخلو یاتیردی؛ یاتمازدان اؤنجه بیر یوخو داواسی آتیب، بیرآز دا زاریماسایدی یوخوسو گلمیردی. نئجه دئیرلر، «داوا-درمانی، نوخود-کیشمیش کیمی یئییردی».

نئچه واخت ایدی اولور سبب‌لی، یاخود سبب‌سیز شئی‌لردن اؤترو آغلاییردی.
مثل اوچون: یوخو داواسی قورتاراندا اوشاق کیمی آغلاماسی، آذان سسینی ائشیدنده گؤزلرینین دولماسی، بلکه لاپ یئرسیز گؤز یاشی آخیتماسی، بیر دفعه ساچینی خینا ایله بویایارکن، خینانین آز اولوب ساچینین بیر قیسمینه چاتماماسی ایدی؛
بونا گؤره ده دوکتور اونا شنلیک‌لر و گؤزل طبیعتی اولان یئرلرده اولماغی مصلحت گؤرموشدو.
اونسوز دا اونون یاشادیغی کند یام-یاشیل ایدی.
شنلیک‌‌لرده اولماغی سئومه‌سه ده، بعضن قیزی طاهیره، تاخجادان ییرتیق قاوالی گؤتوروب چالیردی:
_ «هامی‌دان گؤزل، آی گوله‌بتین
دولدور وئر ایچک، آی گوله‌بتین».
آناسینی روحلاندیرماق اوچون طاهیره بو ماهنینی اوخویوردو؛
هم اوخویوردو، هم ده سیندیریردی.
بیر دفعه ده گوله‌بتین سیندیرمیشدی؛ قاوالی قیزینین کله‌سینده.
نییه؟
توتماجاسی توتموشدو، وورموشدو. آخی سس باشینا دوشور.

باشینین زوققولتوسوندان کال‌یوخولو دوروب مطبخه کئچدی. یایلیغینین اوجونو دیشینه توتوب، یاشماق وئردی؛ بو اونون همیشه‌کی عادتی ایدی. اونسوز دا مطبخ‌ده قیزی طاهیره‌دن باشقا کیم‌سه یوخ ایدی. قاشلارینی چاتیب، ألینی بورنونا باسیب، گوله‌بتین آجیقلاندی:
_قارا گله‌سن قیز! یئنه بو مئرَتی بیشیردین؟ آداما نئچه دفعه دئیرلر آخی؟ بو زهری‌ماردان أل چک ده‌ه!
گوله‌بتین، طاهیره‌نین بیشیردییی خوره‌یی نظرده توتوردو. طاهیره‌ شام یئمه‌یینه بالیق قیزارتمیشدی.
ایستی تاوانی اوجاغین اوستوندن گؤتوردب، غضب‌له باییرا توللاییب، گوله‌بتین یئنه ده هؤنکور-هؤنکور آغلاماغا باشلادی.
طاهیره ده آناسینی بو قدر عصبی و حساس گؤروب، لال-دینمز، گؤزلری دولموش حالدا، یازیق‌جاسینا حیطه چیخدی کی، یئره تؤکولموش بالیق‌لاری سوپورسون!

گوله‌بتینین بو دلی‌لییی، قاپی‌داکی کؤپه‌یه قازانمیشدی؛ بالیق‌لاری نوش‌جانلیقلا أنگ دیشی‌یله خیرچیلدادیردی.
ایت ده نه ایت! اوْتور قابیرغالارینی سای؛
دیلسیزین قارنی اوْنورغاسینا یاپیشمیشدی؛
چلیمسیزلیکده ائله یییه‌سینه بنزه‌ییردی.
گوله‌بتین یازیق ایتین ده گؤزونون اودون آلمیشدی. ایت ائیوانا چیخاندا اوستونه داغ سو تؤکموشدو.
اودو-بودو گوله‌بتینین کؤلگه‌سیندن قورخوردو یازیق ایت.
اونو دا دئییم کی، تکجه بالیق یوخ، گوله‌بتینین مزاجی چکمه‌دییی یئمک‌لرین سایی داها چوخ ایدی.
قاپی‌داکی کند تویوق‌لارینی دا باغچادا قورباغا یئینده گؤرموشدو.
عومومیت‌له او أت‌له بیشیریلن یئمک‌لری یئمیردی!
یئمیردی هئچ، اوسته‌لیک زهله‌سی ده گئدیردی؛
کئچمیشده طاهیره‌ ماکارون آساندا دا، بونا بنظر حادیثه باش وئرمیشدی؛ آخی گوله‌بتین ماکارون‌دان‌ دا ایره‌نیردی.
دئییردی قوردا اوخشاییر.
بیر سؤزله: «آت گئتمز یول‌لاری وار ایدی» گوله‌بتینین.

یای فصلینین قیزمار گون‌لری
آرتیق گلیب چاتمیشدی. هاوالار چوخ ایستی کئچیردی. کند اهالی‌سی ده بو فورصتدن ایستیفاده ائدیب، هره اؤزو ایله بیرآز یون، بیر-ایکی دنه ده خالچادان-پتی‌دن گؤتوروب، آراز چاییندا یوماغا آپاریردیلار.
آرازین کندله مسافه‌سی چوخ آز ایدی. او قدر آز کی، کئچمیشده آراز داشاندا کنده سئل گلمیشدی.
سئل‌ ده دئینده، آزاجیق داشیب-قورخوزموشدو.
آما آدینی سئل قویموشدولار.

_«آز طاهیره، آز ائی! گئتسن گَل، آما بیرآز تئز.
تراختورلا گئدیریک. آغام تیره‌نی قوشونجا گَل. بیرآز چیمیشیب، کئفه باخاریق».

آغدس ایدی، قونشونون قیزی.

وار-یوخدا طاهیره‌نین تکجه دوستو.

تندیرخانانین باجاسیندان ألین پارانتز کیمی دوداغینین قیراغینا توتوب، آشاغی سسله «طاهیره-طاهیره» دئییردی.

طاهیره ائوین تک اوشاغی اولدوغو اوچون برک داریخیردی. ائله بونا گؤره ده بو خوش هاوادا، ائوده قالیب باغری چاتلاماسین دئیه، ائیوانا سریلن کؤهنه خالچانی دورگه‌له‌ییب، قونشولارلا آرازا گئتمک فیکرینه دوشدو.
_«یاخشی چیغیرما، گئت، گلدیم» طاهیره دئدی.

_ «کوْر کوْرو تاپار، سو چوخورو.

جهنم اول ایت قیزی ایت».

بو دا گوله‌بتین ایدی!

قیزلارین سسینی ائشیدن کیمی، اؤلوسونو باییرا توللامیشدی.

«ایت اؤزون‌سن» دئییب، تو دابانا، آغدس أکیلدی.

دیشی باغیرساغین کسن طاهیره، «سنه آغام قنیم ایدی» یاواشجا دئییب، درحال قورخوسوندان گولومسه‌ییب، زارافات ائله‌دییینی بیلدیرمک ایسته‌دی. دئدییی سؤزه پئشمان اولموشدو.

_ «آغاوین گوْرونا سی...

یئری جهنم اول قاپی-باجانی سوپور.

قیز، قیزیب‌ها. آرازدا نه وار؟

هله اونون-مونون یونون یوماغا گئدیر. قاییت»!

بیر-ایکی دنه ده سؤیوش دئییب گئدیشینه مانع اولاندان سونرا ائوه قایتاردی.

گورو سؤیولن کیم ایدی؟

"عوض".

پینتی، بسته‌بوی، چاتماقاش.

سیر-صیفت‌دن ده بیرآز کیفیر. آما کند ایشینده زیرنگ. اود پارچاسی. ألینه ایش وئرن ده، ائله زیرنگ‌لییی اولدو.

تایا قوراندا، تایانین اوستوندن ییخیلدی اؤلدو.
جانی ائله اورادا چیخدی.

زیرنگ قوش دیمدیییندن ایلیشدی.

اولا بیلسین کیمسه، گوله‌بتینین تئز-تئز سینیری قیجیقلانیب، دقیقه‌باشی چاتانا آغیز آتماسینین سببینی، أری عوض‌ین اؤلوموندن سونرا تؤرندییینی سانسین؛

عوض‌ی سئودیییندن، عوض‌سیز یاشایا بیلمه‌دیییندن، دلی‌سوْو، دؤزولمز حیات یاشاییر دئسین.

همن سؤزلری دئین‌لره "یوخ" دئمه‌لی‌یم.
ائله سانماسین‌لار.

عوض دیری ایکن، اؤزو، اؤز أل‌لری ایله آروادینی دوکتوره آپارمیشدی.

آنجاق عومومی دوکتوره!
ایمانیم یانسا دا، منجه پیسیخولوق، یاخود، اوزمان بیر دوکتوره آپارسایدی، سورغو-سوال و آنالیزدن سونرا، "بو خسته‌لییین کؤکو اوشاقلیقدادی دئیردی"

سؤزون قیساسی:

عؤمرو بویو گوله‌بتین‌له یولا گئتمه‌دیلر.
_کوْنازین بیری‌یدی، «منه گؤز وئردی، ایشیق وئرمه‌دی»، «کوْر-کوْر، گؤر-گؤر». سیز کی، اونون خوی-خیصلتینه بلد ایدیز! دئییب، گوله‌بتین همیشه پیسلردی اونو قونوم-قونشویا.

عوض‌ین اؤلوسویله ده یولا گئتمیردی.
نه‌اینکی عوض، گوله‌بتینین یولا گئتدییی بیریسی یوخ ایدی.

وارسا دا، من تانیمیرام.