کولت.آذ روزبه صمدی نیراوغلونون اوشاق ادبیاتی سئرییاسیندان «آذربایجان ناغیللاری» تلگرام کانالیندا یاییملانان «قورد نان قویون» آدلی شعیری تقدیم ادیر:

«سئویملی اوشاقلار »

گونلرین بیر گونو ائدرکن اویون
سورودن آیریلدی بیر قارا قویون

بیردن باش قووزویوب دؤره یه باخدی
گؤردو کی سورودن بیر خبر یوخدی

قالمیشدی او یازیق چؤلده آوارا
بیردن گؤزو دوشدو بیر جاناوارا

گؤردو کی دیرماشیر داغدان یوخاری
اوز توتوبدو گلیر دوز اونا ساری

یازیقین قورخودان اسدی دیزلری
هارایچی آختاردی یورقون گؤزلری

قورتدا او یوققوشو دیرماشیب گلدی
قویونون اؤنونده یئره چؤنبلدی

قویـون نانه کیمی اسدی قورخودان
قوردون گؤزلرینی بوروموشدو قان

تله سیک سؤیله دی: سالام آی جاناب
آمما جاناواردان چیخمادی جاواب

جاناوار دیشلرین چاققیلدادیردی
گئت گئده قویونون رنگی آتیردی

جاناوار قویونا دئدی : آی نادان
سن منیم مولکومه یول تاپدین هاردان؟

بورا منیمکیدی مگر بیلمیسن؟
نه اوچون بورانین اوتون یئییبسن؟

ایندی گوناهووی سنه دییه رم
عوضینده منده سنی یییه رم

قویون آنلادی کی آشی پیشیبدی
قوردون تله سینه برک ایلیشیبدی

بیر یول آختاریردی کلک قورماغا
قوردون تله سیندن جان قوتارماغا

قویون بیردن دئدی یاخشی من ایندی
هایاندان بیلیم کی بورا سنیندی؟

گل گئدک اوّلده اوجاغا آند ایچ
سونرا بدنیمی دیشلرونن بیچ

اگر دئدیگووه آند ایچمه سون سن
اینان یئمه گووه جان وئرمه رم من

جاناوار دئدی : آی هاچا دیرناخ
مین یول او اوجاغا آند ایچه رم باخ

ایکیسی قوشولوب یولا دوشدولر
نئچه آلچاق اوجا داغلار کئچدیلر

اوزاخدان گؤرسندی یوغون بیر آغاج
چوبان ایتی اوردا یوخلامیشدی آج

گلیب یئتیشدیلر اونون دیبینه
قویون الین قویدو اونون اوستونه

دئدی : اوجاق بودو ال چالیب آند ایچ
آند ایچسون سن اوچون سؤزوم یوخدو هئچ

آغاجین دیبنده ایت یوخلامیشدی
کلّه سین قارنیندا قوجاخلامیشدی

جاناوار آغاجا الین کی چالدی
ایتین قولاخلاری بیردن شاخالدی

آییلیب یوخودان قووزاندی یئردن
قوردون بوغازیندان یاپیشدی بیردن

قورد قاچدی داغلارین آشدی بئلیندن
قویوندا قورتاردی قوردون الیندن