کولت. آذ صمد وورغونون "آلا گؤزلر" آدلی شعیری تقدیم ائدیر:

یئنه قیلینجینی چک‌دی اوستومه،
قوربانی اولدوغوم او آلا گؤزلر.
یئنه جللاد اولوب دوردو قصدیمه،
قله‌م قاش آلتین‌دا پیالا گؤزلر.

باشیم‌دان گئتمیش‌دی سئودانین قمی،
خیالیم گزیردی بوتون عالمی.
بو دوستاق کؤن‌لومو، دئیین، یئنه‌می
چکدینیز سورغویا، سوالا، گؤزلر؟

سئودا یول‌چوسویام ازل یاشیم‌دان،
کؤنلوم آیری گزیر جان سیرداشیم‌دان؛
داغی‌دیر هوشومو آلیر باشیم‌دان
سوزولوب گئدن‌ده خیالا گؤزلر.

گردنین مینادیر، بویون تاماشا،
آی دا حسد چکیر او قلم قاشا.
بیر جوت اولدوز کیمی وئریب باش-باشا،
یانیب شؤله سالیر جامالا گؤزلر.

منیم سئوگیلیم‌دیر او گؤزل پری،
قوی اوزه وورماسین کئچه‌ن گونلری.
من قدیربیلنم ازلدن بری،
سیزینله یئتمیشم کمالا، گؤزلر.

جهان‌دا هر حکمو بیر زامان وئریر،
دونه‌ن دؤوران سوره‌ن بو گون جان وئریر.
ایللر خسته‌سییه‌م، یارام قان وئریر،
سیز منی سالدینیز بو حالا، گؤزلر.