بیر گون آدلیم یونان فیلسوفو سقراط، بیر کیشی‌نین چوخ ناراحات و دالغین اولدوغونو گؤردو. سوروشدو:

- "ندن بئله دالغین‌سان؟"

او دا بئله جاواب وئردی:

"یولدا گلیرکن تانیش‌لاردان بیرینی گؤردوم، سالام دئدیم جاواب وئرمه‌ییب، سایمازجاسینا غرورلا کئچیب گئتدی. من ده اونون بو داورانیشیندان اولدوقجا اینجییب ناراحات اولدوم."

سقراط دئدی:

- "نیه اینجیدین؟"

کیشی تعجب‌له دئدی:

- "بللی‌دیر دا، بئله داورانیش‌لار اینجیدیجی اولور."

سقراط سوروشدو: "یولدا یئره ییخیلیب، آغریدان، خسته‌لیکدن درد چکن بیرینی گؤرسئیدین اونون الیندن اینجیک و ناراحات اولاردین‌می؟

کیشی دئدی:

- "البته کی ناراحات اولمازدیم. بیریسی‌نین خسته اولدوغوندان آدام اینجیمز کی.

سقراط سوروشدو: "اینجیکلیک یئرینه نه حس ائدیب، نه ایش گؤرردین؟"

کیشی جواب وئردی: " اوره‌ییم یاناردی، محبتلی داورانیب، اونو بیر حکیمه درمان ائتمیه گؤتورردیم."
سقراط دئدی:

- بو ایشلری اونو خسته ساندییغین اوچون ائدردین. سنجه انسانین ساده‌جه جیسمی‌می مریض اولار؟ سنجه داورانیشی دوغرو اولمایان بیری‌نین روحو خسته دئییل‌می؟ بیری‌نین فکری و روحو ساغلام اولسا، کسینلیکله هئچ زامان یانلیش داورانماز. فکر و روح خسته‌لییینه «غفلت» دئییلیر، غفلت ائدیب، یانلیش ایشلر گؤره‌نه، اورک یاندیریب یاردیم ائتمه‌لی، اونو حکیمه گؤتوروب، اینجیک اولماق یئرینه اونا مهربان و سایقیلی یاناشیب، معنوی - روحی یاردیم ائتک گرک.

بس هئچ کسدن اینجیک اولما، اوریینی کین‌له دولدورما، بونو بیل کی، یانلیش داورانان بیریسی، او آن خسته‌دیر.