کولت. آذ گونیلی شاعر علی توده‌نین "من نه گتیردیم..." آدلی شعیرینی تقدیم ائدیر:

من اؤز قارداشیما مهمان گلن‌ده
بیر قلم، بیر دفتر، بیر جان گتیردیم
داغلارین دؤشونو توپلار دلنده
بیر لکه دوشمیه‌ن ویجدان گتیردیم.

من اونو گونش‌دن تمیز ساخلادیم،
جانیم‌دان، گؤزومدن عزیز ساخلادیم،
بو کیچیک قلبیمده دنیز ساخلادیم
بیر خیلقت گؤرمدی، پنهان گتیردیم

اوجوز توتماسینلار بو سووقاتی‌می
حیس‌یمی، دویغومو، احساساتی‌می،
من اؤز وارلیغی‌می، اؤز حیاتی‌می
دوغما قارداشیما قوربان گتیردیم.

اورک داش دئییل‌دیر، بیر پارچا اتدیر
بس اونو یاشادان هان‌سی قودرتدیر؟
بیر آرزو، بیر اومید، بیر محبت‌دیر،
من او محبت‌دن نیشان گتیردیم.

قارداشیم، ایللرله ایستدین کی سن
اؤز آنا یوردوم‌دا آزاد اولوم من…
لاکین جلالی‌می داغیتدی دوشمن،
تک سنه، تک سنه گومان گتیردیم.

یئنه آذربایجان قان آغلاییر، قان
او آزاد اولماسا، یاشامام، اینان!
گرک من تبریزه قایی‌دان زامان
دئیه‌م کی، تزه بیر دؤوران گتیردیم.