کولت. آز گؤرکملی شاعر رامیز رؤوشنین ۱۹۷۱-جی ایلده – ۲۵ یاشین‌دا یازدیغی و ایندیدک هئچ بیر کیتابینا داخیل ائلمدیی «منی سایمایانلار» شعیرینی تقدیم ائدیر:

منیم بو دونیادا خوشبخت اولماغا

گؤره‌ن حاقیم وارمی؟

یقین کی، یوخدو.

بیر گون بو دونیادان قاچیب اوزاغا،

دئیره‌م: ایلاهی، دونیان سویوقدو.

دئیره‌م: ایلاهی، بو نئجه ایشدی،

توپور گونشه ده، توپور آیا دا.

یا سن بو دونیانی تمام دییش‌دیر،

یا اؤزگه گؤزله باخ بو دونیایا دا.

بیر آز یاغیش‌دان کس، بیر آز بولوددان،

قوی بو کؤهنه ائوین دامی دامماسین.

بیر آز سئوینج‌دن کس، بیر آز اومیددن،

قاریش‌دیر دردیمه، – هاوالانماسین.

اؤزون کی همیشه گؤی‌دن باخیرسان،

من آخی کیمه‌م کی، سنی آلدادام.

کئفیم ساز اولان‌دا -

یاددان چیخیرسان،

کئفیم پیس اولان‌دا -

دوشورسن یادا.

ایندی ها سؤز قوشوم آیا، اولدوزا،

ها دئییم، بو گئجه گؤزل گئجه‌دی.

بو گئجه من سنه اوز توتموشام‌سا،

اؤزون بیلیرسن کی، کئفیم نئجه‌دی.

نه چوخ‌دو کئفیمه سوغان دوغرایان،

کئفیم‌دن خؤرک‌می بیشیره‌جکلر؟

من آخی نه شاهام، نه شاه اوغلویام،

منی هان‌سی تاخت‌دان دوشوره‌جکلر؟!

منی سایمایانی من ده سایمادیم،

آرت‌دی گون‌دن-گونه سایمادیقلاریم.

سن منیم باشیما عقل قویمادین،

اونلارین باشینا عقل قوی باری.

منی سایمایانلار آخماق‌دی، آخماق،

اونلار نه بیلیر کی، آخی کیمه‌م من؟

منی سایمایانلار بیر واخت سایاجاق،

اوندا گؤره‌جکلر؛ بیر یوخ، مینه‌م من!…