کول. آذ آذربایجانین شاعری محمدحسئین شهریارین "یالان دونیا" شعرینی تقدیم ائدیر:

سنین بهره‌ن ییه‌ن کیم‌دیر؟
کیمینکیسه‌ن، ییه‌ن کیم‌دیر؟
سنه دوغرو دئیه‌ن کیم‌دیر؟
یالان دونیا، یالان دونیا!

آتی ازل داغا سالدیق،
یورولدوقجا دالی قالدیق،
آتی ساتدیق، اولاق آلدیق،
یهر اولدو پالان دونیا.

سنی بایقوشلار آلقیشلار،
دلی ویرانه‌نی خوشلار،
دولان عقله سنی بوشلار.
ایچی بوشلا دولان دونیا.

اوجاق ایکن سؤننمیشسه‌ن،
چاناق ایک‌ن چؤننمیشسه‌ن،
نه پیس قاری ننیمیشسه‌ن،
ناغیل، یالان-پالان دونیا.

بیری آینا، بیری پاس‌دیر،
بیری آیدین، بیری کاس‌دیر،
گئجه تویدور، سحر یاس‌دیر،
گول آچدیقجا سولان دونیا.

ایگیدلرین باشین ییه‌ن،
قوجالار بوزباشین ییه‌ن،
قبیرلرین داشین ییه‌ن،
اؤزو یئنه قالان دونیا.

یامان قورقو، ییغیلایدین،
توفانلاردا بوغولایدین،
نولای‌دی بیر داغیلایدین،
بیزی درده سالان دونیا.