کولت. آذ مممد آرازین "آیاغا دور، آذربایجان، سنینله‌یه‌م!" آدلی شعیرینی تقدیم ائدیر:

نه یاتمی‌سان، قوجا وولکان، سنینله‌یه‌م!
آیاغا دور، آذربایجان، سنینله‌یه‌م!
سن‌دن غیری
بیز هر شئیی بؤله بیل‌لیک!
سن‌دن غیری
بیز هامیمیز اؤله بیل‌لیک!
بو، شهریار هارایی‌دی،
بو، بختیار هارایی‌دی!
هانی سنین توفان ییخان،
گورشاد بوغان یوردا اوغول
اوغوللارین!
قارا چوبان، دلی دومرول اوغوللارین.
چک سینه‌نه-قایالاری یاماق ائله،
حاق یولونو آیاغینا دولاق ائله،
بایراغینی خزر بوی‌دا بای‌راق ائله،
ائنمزلییه قالخمیش اولان بایراغینی!
آذربایجان، آذربایجان،
آذربایجان بایراغینی!
آیاغا دور، آذربایجان!
بونو بیزه زامان دئییر،
مزارین‌دان باش قال‌دیران بابان دئییر!
نر اوغلو نر، سنینله‌یه‌م!
سنینله‌یه‌م، سلاح توتان،
کولونگ توتان، یابا توتان،
کؤسؤی توتان، نیشان‌لی ار، سنینله‌یه‌م!
سنینله‌یه‌م، قیز آتاسی،
هانی نره‌ن، هانی سسین!
هانی آندین!
یوخ‌سا سن ده یاتمیشلارا، باتمیشلارا،
قئیرتینی ساتمیشلارا خیردالاندین!!!
گؤزونو سیل، وطن اوغلو،
آیاغا قالخ!
اوفوقونه بیر یاخشی باخ.
سرحددینه بیر یاخشی باخ.
سرحددینین کمندینه بیر یاخشی باخ!
دور، ایچین‌دن قورخونو بوغ،
اؤلومونله، قالیمینی آییرد ائله.
دور، ایچین‌دن قورخاغی قوو،
دور، اؤزونو بوزقورد ائله!
بیر سسین‌دن مین سس دینر،
نئچه-نئچه داشا دؤنموش دینمز دینر!
اوددان بیتر، قان‌دان بیتر اییلمزلر!
مرد اوغوللار-مردلیگیله اؤیونمزلر!
تورپاق آلتدا اؤلوملویه گؤمولمزلر.
واریم، یوخوم، سنینله‌یه‌م،
آزیم، چوخوم، سنینله‌یه‌م،
شیرین یوخوم، سنینله‌یه‌م.
ییخین منی سؤز آتین‌دان،
آتین منی تانک آلتینا.
ازین منی خینجیم-خینجیم،
کسمیر اگر سؤز قیلینجیم،
دیدین منی دیدیم-دیدیم،
آتین منی تانک آلتینا.
قونداق‌داکی بیر کؤرپه‌نی
خلاص ائدیم.
نئچه "سنی"، نئچه "منی" خلاص ائدیم.
سنینله‌یه‌م،
سؤزو غم‌لی، اؤزو دملی
رهبر آدام!
۱۹۱۸-ده ووروشوردو،
دانیشمیردی رنجبر آتان،
رنجبر آتام!
سنینله‌یه‌م، حاق-عدالت، سنینله‌یه‌م،
میللی قورور، میللی قئیرت، سنینله‌یه‌م!
سپیل قوما، گؤیر یئرده، بیت قایادا،
گیزلی نیفرت، آچیق نیفرت، سنینله‌یه‌م،
اویات بیزی، ائی یارادان، سنینله‌یه‌م!
یا بیلمرره یاتیرت بیزی،
یا بیلمرره اویات بیزی،
یا یئنی‌دن یارات بیزی،
ائی یارادان، سنینله‌یه‌م،
سنینله‌یه‌م، یاتمیش وولکان،
سنینله‌یه‌م!
آیاغا دور، آذربایجان،
سنینله‌یه‌م!