کولت. آز گونئی‌لی شاعر مرضیهاحمدیاسکوئیاون "من گونشی سئویرم" آدلی شعرینی تقدیم ائدیر:

اوشاقلیق عالمی‌ایدی، اوره‌ییم ایشیق ایدی ‏

کیچیک، تمیز دونیاما، اویون یاراشیق ایدی. ‏
یولداشلاریم، دؤوره‌مده، هامیسی شاد، کینه‌سیز ‏
بیر آن کوسو اولسایدی، گئنه باریشیق ایدی. ‏
قارانلیق، قورخولویدی، اما اوندان قاچمازدیق، ‏
گئجه‌لر ناغیللاردا شیرین، تمیز محبت ‏
بیزی باریشدیراردی. ‏
ائله بونا گؤره ده، ‏
کؤنلوموزون قاپیسین کینه‌لره آچمازدیق. ‏
ائله بیل گؤزلریمیز گئجه‌لر ده گؤرردی، ‏
اولدوزلار آی-گونش تک بیزه ایشیق وئرردی. ‏
بئله ایشیقلی گونده، گؤیه بولود گلسه‌یدی، ‏
کئچری کیچیک بولود گونون اوستون آلسایدی، ‏
بیلیردیک گون چیخاجاق، بولود دا قالمایاجاق. ‏
گئنه ده دسته‌لشیب، دورماییب باغیراردیق، ‏
گونشی نغمه‌لرله قوناق دا چاغیراردیق. ‏
«گونوم گئدیب سو ایشسین، ‏
آبی دونون ده‌ییشسین… ‏
گونوم، چیخ، چیخ». ‏
آیلار، ایللر دولاندی… ‏
زامان، ناققا بالیق تک، اوشاقلیغیمی اوددو،‏
کئچری غملریمین، کیچیک سئوینجلریمین ‏
یئرین بؤیوک کدرلر، سؤنمز کینه‌لر توتدو. ‏
گونش بیزیم اؤلکه‌دن اوغورلاندی، توتولدو، ‏
ایستی ایشیق چئشمه‌سی قورودو و قورتولدو. ‏
ایندی ایللردن بری گئجه‌لریمی آیسیز، ‏
گوندوزلریمی گونسوز باشا چاتدیریرام من. ‏
بؤهتان، یالان آلدانمیش یوردوموزو بورویوب،‏
شادلیغین، سعادتین کؤکو دیبدن قورویوب. ‏
هئچ زاد قارانلیق کیمی منیم کؤنلومو سیخمیر، ‏
او گؤزه‌ل اوشاقلیغیم بیر آن یادیمدان چیخمیر. ‏
ایندی نئجه تابلاشیم بیر بئله قارانلیغا؟ ‏
بیر ده دوشونور‌م کی، گونش تکجه بورادان یوخ، ‏
آیری اؤلکه‌لردن ده یامانجا اوغورلانیب. ‏
بونو دا دوشونور‌م: او قارانلیق زیندانی ‏
اوشاقلیقدا اوخویان نغمه‌لر ییخا بیلمز، ‏
او قارا دوستاقلاردان یالقیز سس چیخا بیلمز. ‏
آتا-بابا سؤیله‌ین «دمیر چاریق» کؤهنه‌لیب، ‏
ایندی بو چتین یولدا دمیر آیاق لازیمدیر. ‏
دمیر عصا آتیلیب، ناغیللارا قاتیلیب، ‏
ایندی پولاددان توفنگ، حدسیز-حساب‌سیز فیشنگ، ‏
خالقین سؤنمز عشقیندن بیر ده دایاق لازیمدیر. ‏
هر کس سئوسه گونشی باشقا سئوگیسین آتار، ‏
یورولوب یولدا قالماز، اونودار اؤزونو ده. ‏
اوزاق داغلار دالیندان گئدیب گونشی تاپار. ‏
اوجا سسله دئییرم:
من گونشی سئویرم! ‏
من گونشی سئویرم