رستم عمینین قارداشی غلام، قویونلاری خسروشاهین اواراق داغی‌نین اتکلرینده یاییب، اؤزو ده ائششه-یین اوستوندن خورجونو گؤتوروب، کیچیک چایدانی چیخاریب، بارداخدان سویو تؤکوب دولدوروب چایی اودلاندیردی .

آز قالیردی کی، سو قایناغا گلسین، قویونلار بیردن اورکوب، غلاما طرف قاچدیلار، ایتلر ده هورماغا باشلادیلار. غلام جلد آیاغا قالخیب، ال آغاجیسین الینه گؤتوروب، او یان بو یانا باخدی. داغین زیروهسینده گؤزو بیر یئکه قوردا دوشدو کی، اوز یوخاری قالخیب، داشلارین آراسینا گئتدی. او تئزجه قویونلاری بیر یئره توپلاییب اؤز- اؤزونه دئدی:

- گرک تئز ائوه قاییدیب، قویونلاری طؤله‌یه سالیب، قارداشیم رستم ایله بیرلیکده قاییدام .

غلام ائوه قاییداندا رستم عمی مال- داوار حیه‌طینی تمیزلهییردی.

- قردش غلام نه تئز قاییتدون؟ دئیه سوروشدو.

- داغدا قورد واریدی، قورخدوم تکلیقدا گوجوم چاتماییب قویونلاری قوردا وئرم، دئدیم عاغیللیسی بودور کی، ائوه قاییدیب، سن ایله بیرلیکده داغا قاییداخ.

- چوخ یاخشی ایش گؤروبسن گئدک .

رستم عمی ایله غلام ائششک¬لرینی منیب داغا ساری یولا دوشدولر .

اواراق داغینا چاتاندا، غلام قوردون هاردا گؤردوبونو رستم عمی‌یه گؤستردی. بیرآز یوخاری قالخاندان سونرا، غلام ائششهبینی دایاندیردی:

- باخ قارداش قورد اودی با!

رستم عمی الینی آلنینا قویوب، غلام نیشان وئرن طرفه باخدی.

- غلام گؤزوندن ایراق اوچ دانا دا بالاسی وار!

- من هیچ بالالارینی گؤرموردوم، ایندی نئیله‌یک ؟

-غلام گل بیر ایش گؤرک قوردو گوداخ، هاچان خؤرک گتیرماغا گئدیب یوواسیندان اوزاقلاشسا گئدیب بالالارینی توتوب آپاراخ!
- چوخ یاخشی سؤزدو داداش!

اونلار بیر بؤیوک داشین دالیسیندا گیزلندیلر. بیر ساعات سونرا رستم عمی دئدی:

- غلام! باخ، قورد ائلهبیل چیخیب، گئدیر، حاضیر اول گئدک.

- قوی توربانی، بیرده ال آغاجینی گؤتوروم گئدک.

اونلارقوردون یوواسینا چاتاندا، آنا قورد اورادان چوخ اوزاقلاشمیشدی، قوردون بالالاری یووالاریندا یاواش- یاوش اولاییردیلار. غلام اوزونو قارداشینا توتوب دئدی:

- قارداش قوی من توربا ایله ایچه¬ری گیریم، بالالاری توتماغا، سن ده دؤر- بری قُورو، قورد گلسه منه خبر وئر .
قوردون یوواسی‌نین نئچه یولو وار ایدی، غلام بیریندن ایچهری گیردی. رستم عمی ائشیکده اولاراق بیردن اووولتو سسی گلدی. او یانا باخاندا آنا قوردو گؤردو. آنا هاردان آنلاییب یئل کیمی اؤزونو بالالارینا یئتیرمیشدی. رستم عمی هارای چکنهجه مجال تاپمادی. قورد یوواسی‌نین او بیریسی یولوندان ایچهری گیرنده ائله بدنی‌نین یاریسی ایچهریده اولاراق، قویروغوندان یاپیشدی. قورد دالی قیچلاری ایله توپراقلاری اونون اوزونه سپهرک قاباق قیچلاری ایله دارتیندی کی، ایچهری گیرسین. غلام ایچه¬ریدن سسلندی.
-داداش نه توز- توپراق سالیبسان؟

رستم عمی دیزلرینی یئره دیرهییب، قوردون ایچه¬ری گیرمه‌سینه مانع اولاراق دئدی:
- اده چیخ قاچ !

غلام بو سؤزو ائشیتمه¬دی یئنه ایچهریدن دئدی:

- رستم داداش نه توز- توپراق سالمیسان؟ بوغولدوم!

رستم عمی باغیردی:

- «توز- توپراق اوندادیر کی، قویروق الدن چیخا»* اده تئز چیخ قاچ!

غلام بو یول ائشیدیب، تئزجه یووادان چیخیب، اوزآشاغی قاچدی. رستم عمی ده قوردون قویروغونو بوراخیب، اونا قوشولوب قاچماغا باشلادیلار. اونلار تکجه بونا سئوینیردیلرکی، قوردون چنگینه دوشمه‌ییبلر.