کولت. آز رامیز رؤوشه‌نین "قوجالیق" آدلی شئیرینی شاعرین اؤز ایفاسین‌دا تقدیم ائدیر:

تنهالیق باشلاییر بوردان او یانا،
کئچدیکجه کئچیلمز، آتام بالاسی.
آیلاری، ایللری توت‌سان بویونا،
چایلاری، چؤللری توت‌سان بویونا،
اؤلچدوکجه اؤلچولمز، آتام بالاسی.

داها چوخلارییلا آرام سرینلر،
چوخلاری بویوما سئوینمز داها.
۲۳ یاشیم‌دا منی سئوه‌نلر
۳۳ یاشیم‌دا سئوممز داها.

من آخی نه چؤله‌م، نه یول، نه کوچه،
من آخی هامینین اولا بیلمره‌م.
منی سئوه‌نلردن اؤترو-اؤلونجه
۲۳ یاشیم‌دا قالا بیلمره‌م.

نه قدر سؤزلر وار سؤزوم‌دن جاوان،
داها چیغیرماغا نفسیم گلمیر.
داها بو دونیادا اؤزوم‌دن جاوان
شئیرلر یازماغا هوسیم گلمیر.

کیریگیر، یومشالیر شئیرلریم ده،
قوجالیر میصراعلار، سؤزلر منیمله.
دوستلار جاوان قالیر شئیرلریم‌دن،
قوجالماق ایستمیر دوستلار منیمله.

ایلاهی، قوجالیق بویموش دئمه‌لی،
دوستلاردان سس‌سیزجه قیریلیر آدام.
عؤمور بیر بولانیق سویموش دئمه‌لی،
عؤمور آزالدیقجا دورولور آدام.

ایچیمین-چؤلومون یویولور پاسی،
ستیرلر گؤیریر بو آغ واراق‌دا.
نه چوخموش اورکله علین آراسی،
نه یاخشی، اؤلمدیم بو آرالیق‌دا.

سؤزلر اورییم‌دن علیمه یئت‌دی،
بیر آزجا سولوخ‌دو-سول‌دو، نه اولار.
بیر آزجا شاخ‌لیغی-شوخ‌لوغو ایتدی،
هئچ کس قیناماسین، یول‌دو، نه اولارش

داها بالتا کسمز آغلیم کسه‌نی،
دونیانین دادینی بیلیرم داها.
بو قوجا دونیادا هر نفه‌سی‌می
آغاج‌دان مئیوتک دریرم داها.

سون نفس دونیادا هر شئی‌دن شیرین،
شاعر ده قوجالیر، اؤلور، بیلیرم.
سؤزون‌دن قان ایگی گلن شاعرین
آغزین‌دان سود ایگی گلیر، بیلیرم.

بو دونیا بیر قاینار قازانمیش دئمه،
سؤندورمز اودونو نه قار، نه یاغیش.
دونیایلا دالاشماق آسانمیش دئمه،
چتینی دونیایلا باریشماغیمیش...