ایلین سون آخشامی ایدی. یئنی ایل یاواش ۔ یاواش یولدان گلیب چاتیردی. هاوا چوخ سویوق ایدی. نارین ۔ نارین قار یاغیردی. قاش قارالماقدا ایدی.

بو سویوق و قارانلیق هاوادا آیاق یالین یوخسول بیر قیز اوشاغی کوچه‌لرده سرگردان گزیردی. سحر ائودن چیخارکن، آیاغیندا آناسیندان یادگار قالمیش آیاق قابیلاری وار ایدی.
بو کؤهنه باشماقلار قیزین آیاقلارینا بؤیوک گلیردی. آمما آیاقلارینی سویوقدان ساخلیردی. کیچیک قیز ایکی فایتون آراسیندان تله‌سیک کئچنده باشماقلار آیاغیندان چیخیب هر بیر تایی بیر طرفه آتیلمیشدی. بیر تایینی تاپا بیلمه‌میش، بیر تایینی ایسه بیر اوغلان اوشاغی قاپیب ۔ قاچمیشدی.

کیچیک قیز سویوقدان گؤیرمیش آیاقلاری ایله یئریییردی. او، الینده کی کیبریت لری ساتماغا چالیشیردی. لاکین سحردن بری بیر قوطو بئله ساتا بیلمه‌میشدی.

کیچیک قیز هم چوخ آج ایدی هم ده سویوقدان تیر ۔ تیر اسیردی.

قیز جیغاز بیر ائوین کونجونه سیغینیب، بوزوشه‌رک اوتوردو. چوخ اوشویوردو. ائوه دؤندوگونو دوشوندو. آمما پشیمان اولدو. کیبریت ساتابیلمه‌دیگی اوچون، ائوه گئده‌بیلمزدی. چونکی آتاسی چوخ حیرصله‌نه‌جک ایدی. اوندان علاوه، ائولری ده کوچه کیمی سویوق ایدی. کیچیک بارماقلاری کئییمیشدی. اگر کیبریت‌لردن بیرینی یاندیرا بیلسه ایدی، چوخ یاخشی اولاردی!

چوخ چتین‌لیکله قوطودان بیر کیبریت چیخاردیب، یاندیردی. کیبریتی اللرینین اطرافینا گزدیردی. سانکی بیر بوخارینین آلووایله قیزیشیردی. کیچیک قیز آیاقلارینی قیزیشدیرماق اوچون، اوزاتماق ایسته‌ینده، کیبریت سؤندو. کیبریتین سؤنمه‌سیله، بوخاری دا گؤزدن ایتدی. بیر کیبریت داها یاندیردی. کیبریتین ایشیغی دیوارا دوشنده، دیوار نازیک پرده‌یه چئویریلدی. ایندی قیز پرده آرخاسیندان ائوین ایچریسینی گؤروردو.

ایچریده آغ سوفره آچیلمیشدی. سوفره‌ده اینجه چینی قابلار دوزولموشدو. قارنی آلبوخارا و آلما ایله دولدورولموش قاز گؤزل قیزاردیلمیشدی. بیردن قیزاردیلمیش قاز قالخیب یولا دوشوب ، اؤزونو کیچیک قیزا چاتدیردی. قیز سئوینه ۔ سئوینه الینی اوزالدیب، اونو گؤتورمک ایسته‌دی.او آندا کیبریت سؤندو و قارانلیق دیوار گؤروندو.

کیچیک قیز داها بیر کیبریت یاندیردی. بو دفعه خیالیندا اؤزونو بزکلی بیر شام آغاجینین آلتیندا گؤردو.
آغاجین بوداقلارینداکی یانان شاملار هر یئری ایشیقلاندیریردی.آغاجین اطرافیندا رنگارنگ اویونجاقلار وارایدی. قیزجیغاز اویونجاقلاری گؤتورمک اوچون، الینی اوزاتدیقدا، کیبریت یئنه سؤندو. شام آغاجی بیردن گؤزدن ایتدی. آغاجین ایتدیگی یئرده پاریل ۔ پاریل یانان اولدوزلار گؤرونوردو. اولدوزلاردان بیری دوشوب، گؤیده اوزون ایشیقلی خط چکدی.قیز آه چکیب، دئدی:

۔ بیر نفر اؤلدو!
اولدوز دوشنده ننه‌سی دئیردی کی، هر اولدوزون دوشمه‌سی بیر نفرین اؤلوم علامتی‌دیر.
قیز بیر کیبریت داها یاندیردی. کیبریتین آلووو اطرافی ایشیقلاندیردی. گۆلر اوزلو و مهریبان ننه‌سی قارشیسیندا دایانیب، اونا باخیردی. قیز چیغیردی:

۔ ننه، منی‌ده آپار! بیلیرم کی، بو کیبریت سؤننده، سن ده او ایستی بوخاری، قیزاریلمیش قاز و گؤزل شام آغاجی کیمی گئده‌جکسن.

ننه گوله ۔ گوله اوندان اوزاقلاشیردی. قیزجیغاز یالواردی:
۔ گئتمه ننه، گئتمه!

قیز تله‌سیک قوطودا اولان بوتون کیبریت‌لری چیخاریب، یاندیرماغا باشلادی. آلوولارین ایچینده ننه‌سی داها گؤزللشمیشدی. قوْللارینی کیچیک قیزا اوزاتدی. قیز ننه‌سینین اللرینی توتوب، هر ایکیسی گؤیه قالخدی.آرتیق نه سویوق وار ایدی، نه آجلیق، نه ده آواره‌لیک...

هر ایکیسی آللاهین یانیندا ایدی.
سحر چاغی اورادان کئچن اینسانلار کیبریت ساتان قیزین اؤلوسونو گؤروب، اونون اوزونده شیرین بیر گولوشه شاهید اولدولار. قیز سویوقدان دونوب، اؤلموشدو.
کیبریت ساتان قیزین قاباغیندا یانمیش کیبریتلره باخانلار باشلارینی تولایاراق ، دئییردیلر:

۔ یازیق قیز، کیبریت‌لری یاندیریب، قیزیشماق ایسته‌ییرمیش!
آمما دوغروسو هئچ کیم بیلمیردی کی، کیچیک قیز نه گؤزل خیاللارا دالیب، چوخ سئودیگی ننه‌سینه قووشموشدو.

هانس کریستین آندرسون
چئویرن:خدیجه حکمت پناه