کولت. آذ-این یوموریستیک لاییحه‌سی داوام ائدیر. ملا نصرالدین لطیفه‌لری سیلسیله‌سین‌دن تقدیم ائدجییمیز نؤوبتی حکایه ایسه "دالی بوندان دا پیس گله‌جک" آدلانیر:

ملا نصرالدینین تیمور لنگله بیرینجی گؤروشونو موختلیف شکیللرده دانیشیرلار. بونلاردان بیری ده بئله‌دیر:

تیمور ملانین حاقین‌دا چوخ ائشیدیبمیش. اؤزونون اوندان داها عقل‌لی، داها حاضیرجواب اولدوغونو اؤز ایانلارینا گؤسترمک اوچون بیر گون ملانی یانینا چاغیرتدیریر.

ملانی سارایا گتیریرلر. تیمور قصداً اونو اوزون مدت قاپی‌دا گوزلتدیکدن سونرا قبول ائدیر.

ملا دا تیمورو هله هئچ گؤرممیش ایمیش. اونون چولاق اولدوغونو دا بیلمیرمیش. ایچرییه گیریب گؤرور کی، تیمور بیر قیچینی دا قاباغا اوزادیب اوتوروب. او دا گلیب تیمورون قاباغین‌دا ایلشیر، بیر قیچینی دا اونون کیمی قاباغا اوزادیر. ملانین بو حرکتی تیمورا یامان توخونور. ائله ظن ائلییر کی، ملا اونون چولاق‌لیغینی اوزونه وورماق ایستییر. فیکرین‌ده توتور کی، ملانی تحقیر ائلسین. بیر آز اوردان-بوردان دانیشان‌دان سونرا دئییر:

- من سنین حاقین‌دا چوخ ائشیتمیشه‌م. ائله بیلیردیم کی، سن دوغرودان دا عقل‌لی بیر آدامسان. اما سحردن صحبت ائلیه-ائلیه ها فیکیر وئریرم، تاپا بیلمیرم کی، مثلاً اوزون قولاق بیر ائششکله سنین آراندا نه تفاووت وار؟

ملا هئچ اؤزونو پوزامادان دئییر:

- سیز حاقلیسینیز، قیبله عالم. بو ساعت دوغرودان دا اوزونقولاق بیر ائششکله منیم آرام‌دا چوخ بؤیوک مسافه یوخدور.

سونرا تئیمورلا اؤز آراسین‌داکی مسافه‌نی گؤستریب علاوه ائلییر:

- اولسا-اولسا، بو ساعت ائششکله منیم آرامدا ایکیجه آرشین‌لیق بیر مسافه وار.

تیمور قیپقیرمیزی قیزاریر. آنجاق هئچ بیر سؤز دئیه بیلمیر. امر ائلییر خؤرک گتیریرلر. بیر آز یئدیکدن سونرا تیمور آغزینی ملانین لاپ بورنونون قاباغین‌دا توتوب برکدن گییریر. ملا باشینی قالدیریب، تیمورون بو ادبسیزلیینه حیران-حیران باخیر. تیمور سئوینیر کی، ملانی اوسته‌له‌ییب. تئز دئییر:

- نوشجان ده، ملا! بیزیم یئرلرده گییرمک دویماق علامتیدیر.

موللا اونا «نوشجان» دئییر، سونرا آغزینی خؤرکله دولدوروب، قصداً تیمورون اوزونه برکدن صبر گتیریر. تیمورون اوز-گؤزو توپورجک آلتین‌دا قالیر. غضبله قالخیر آیاغا کی:

- سن نه ادبسیز آدامسان!

ملا احوالینی پوزمادان دئییر:

- «اللها شوکور» ده، قیبله عالم! بیزیم یئرلرده صبر گتیره‌نده قولاق آسانلار «اللها شوکور» دئیرلر. اگر سن ده اللهینا شوکور ائلمه‌سه‌ن، دالی بوندان دا پیس گله‌جک.