کولت. آز زاهید خلیلین "اینجی" حکایه‌سینی تقدیم ائدیر:

آیی اؤزونو یئتیره‌ن‌ده بولبول زنگوله ووروردو. او نئجه هیه‌جانلا اوخویوردوسا آیینین گلدیینی هئچ کیم هیسس ائتمه‌دی:

-نه اولوب؟-دئیه آیی دونقول‌دان‌دی - بوغازینی نیه ییرتیرسان؟

-بیر باخین،-دئیه دووشان بولبول‌دن قاباق جاواب وئردی. - اوتلارین قولاغین‌دان سال‌لانان بو سیرغالاری گؤرورسونوز؟ اوتلارین قولاغین‌دا شئه دامجیلارین‌دان باشقا بیر شئی یوخ ایدی. بو داملالار گونشین شوالارینی یاواش-یاواش امیر و خوشبخت-خوشبخت پاریلداشیردیلار.

-گؤروره‌م؟ نه اولسون؟ مگر بون‌دان اؤترو بوغاز ییرتیرلار؟

-او بوغازینی ییرتمیر،-دله نازیک سسله اعتراض ائتدی. -اوخویور!

-آخی بو دامجیلارین نیی وار کی، اونلارا باخیب اوخویاسان دا؟!-دئیه آیی دونقول‌دان‌دی و دامجیلارین بیر-ایکی‌سینین دادینا باخ‌دی:

-هئچ یئمه‌لی ده دئییلمیش کی؟

-هه، یوخ، یئمه‌لی دئییل،-چاشمیش دووشان صحبته قاریش‌دی.-ساده‌جه اولاراق بونلار گؤزل‌دیر. بیر باخین اوزوک قاشی کیمی پاریلداشیرلار. هله آز قالیرام دئیه‌م کی، اونلار دونیانین ان قیمت‌لی اینجیلری‌دیر.

-چوخ قیمت‌لی‌دیر؟-دئیه آیی گؤزلرینی برلت‌دی. -اوندا سیزه امر ائدیره‌م، بو ساعت اونلاری ییغیب تؤکون منیم اووجوما. دووشان، دله و بولبول شئه داملالارینی احتیاط‌لی چیچکلرین لچیین‌دن گؤتوروب آیینین اووجونا تؤک‌دولر. اما بو گؤزل داملالار آیینین اووجون‌دا او ساعت اؤز پارلاق‌لیغینی ایتیردی. بیر آزدان آیینین اووجو دول‌دو. او، ایسه بو داملالارلا اللرینی یودو.

سونرالار آیی هامییا دانیشیردی کی، اللرینی دونیانین ان قیمت‌لی اینجیلری ایله یویوب. اما هئچ کس بو سؤزه اینانمیردی.